جہلم: وزیراعلی پنجاب مریم نواز اقلیتوں کے حقوق اور ان کی تحفظ کے لیے ہر لمحہ متحرک ہیں، پنجاب حکومت کی جانب سے اقلیتوں کی مالی امداد کے لیے مینارٹی کارڈ کا اجراء کیا گیا ہے، جس میں پہلے مرحلے میں 37 مستحق اقلیتی خاندانوں کو منیارٹی کارڈ دیے گئے جبکہ آج دوسرے مرحلے میں 50 مستحق خاندانوں کو منیارٹی کارڈ دیے جا رہے ہیں۔
یہ بات ایڈیشنل ڈپٹی کمشنر جنرل جہلم صباء سحر نے ضلع کونسل ہال میں منیارٹی کارڈ تقسیم کرنے کی تقریب سے گفتگو کرتے ہوئے کہی۔ اس موقع پر سابق ممبر صوبائی اسمبلی چوہدری ندیم خادم نے کہا کہ مسلم لیگ ن کی حکومت ہر طبقہ فکر خاص طور پر اقلیتوں کو حقوق دینے کے لیے کوشاں ہے۔
چوہدری ندیم خادم نے کہا کہ وزیر اعلی پنجاب کی جانب سے مستحق اقلیتی خاندانوں کی سہ ماہی امداد کا سلسلہ جاری ہے، ضلع جہلم میں درجنوں افراد کو منیارٹی کارڈ دیے جا چکے ہیں جبکہ مزید دیے جا رہے ہیں۔
ایڈیشنل ڈپٹی کمشنر جنرل صبا سحر اور ندیم خادم نے 50 اقلیتی خاندانوں میں منیارٹی کارڈ تقسیم کیے جس کے تحت ان کو ہر تین ماہ بعد 10 ہزار 500 کی امدادی رقم پنجاب حکومت کی طرف سے دی جائے گی۔
اس موقع پر اقلیتی برادری کے رہنماؤں نے ایڈیشنل ڈپٹی کمشنر جنرل صبا سحر، سابق ایم پی اے ندیم خادم اور پنجاب حکومت کا شکریہ ادا کرتے ہوئے کہا کہ پاکستان میں اقلیتی برادری سے تعلق رکھنے والے افراد کی اکثریت غربت کی لکیر سے نیچے ہے ان لوگوں کی مالی امداد بلا شبہ پنجاب حکومت کا بڑا کارنامہ ہے۔
