جہلم: ڈپٹی کمشنر جہلم میر رضا اوزگن کی ہدایت پر ستھرا پنجاب ایجنسی کے تحت شہر بھر میں صفائی ستھرائی کے نظام کو مؤثر بنانے کے لیے روزانہ کی بنیاد پر جامع اقدامات جاری ہیں تاکہ شہریوں کو صاف، صحت مند اور خوشگوار ماحول فراہم کیا جا سکے۔
اس سلسلے میں مینیجنگ ڈائریکٹر ستھرا پنجاب ایجنسی جہلم کی زیر نگرانی ٹیمیں فیلڈ میں متحرک ہیں اور ڈور ٹو ڈور گاربج کلیکشن کو یقینی بنایا جا رہا ہے تاکہ گھروں سے کچرے کی بروقت منتقلی ممکن ہو اور صفائی کے معیار کو بہتر بنایا جا سکے۔
مزید برآں شہر کے مختلف علاقوں میں میکینکل واشنگ اور میکینکل سویپنگ کا عمل بھی تسلسل کے ساتھ جاری ہے، جبکہ قبرستانوں کی صفائی اور دیکھ بھال کے لیے خصوصی ٹیمیں تعینات کی گئی ہیں تاکہ ہر جگہ یکساں صفائی کا نظام برقرار رکھا جا سکے۔
ضلعی انتظامیہ کے مطابق صفائی کے نظام کو مزید بہتر بنانے کے لیے تمام وسائل بروئے کار لائے جا رہے ہیں، جبکہ شہریوں سے بھی اپیل کی گئی ہے کہ وہ صفائی کے عمل میں تعاون کریں تاکہ جہلم کو ایک صاف، صحت مند اور مثالی شہر بنایا جا سکے۔
