دینہ پولیس نے دھوکہ دہی کے مقدمہ میں مطلوب ایک اشتہاری مجرم کو گرفتار کر لیا۔
ترجمان جہلم پولیس کے مطابق یہ کارروائی ایس ایچ او تھانہ دینہ نے اپنی ٹیم کے ہمراہ جدید سائنٹیفک طریقہ کار کو بروئے کار لاتے ہوئے انجام دی۔
ترجمان کے مطابق گرفتار ملزم تھانہ دینہ میں درج دھوکہ دہی کے مقدمہ میں مطلوب تھا اور کافی عرصے سے قانون نافذ کرنے والے اداروں سے بچنے کے لیے روپوش تھا۔ پولیس ٹیم نے خفیہ معلومات اور جدید تفتیشی ذرائع کی مدد سے ملزم کا سراغ لگا کر اسے گرفتار کر لیا۔
ترجمان جہلم پولیس کا کہنا ہے کہ ملزم کے خلاف قانونی کارروائی جاری ہے جبکہ مقدمہ کے دیگر پہلوؤں پر بھی تفتیش کی جا رہی ہے۔
ڈی پی او جہلم شفیق احمد چوہدری نے اس موقع پر کہا کہ ضلع بھر میں جرائم پیشہ عناصر، اشتہاری مجرمان اور قانون شکن افراد کے خلاف کارروائیوں کا سلسلہ بلا تعطل جاری ہے۔ انہوں نے واضح کیا کہ قانون سے فرار ہونے والے عناصر کے خلاف مؤثر حکمت عملی کے تحت کارروائیاں جاری رکھی جائیں گی اور انہیں ہر صورت قانون کے کٹہرے میں لایا جائے گا۔
انہوں نے مزید کہا کہ شہریوں کے جان و مال کے تحفظ، امن و امان کے قیام اور قانون کی عملداری کو ہر صورت یقینی بنانا جہلم پولیس کی اولین ترجیح ہے، جس کے لیے تمام دستیاب وسائل بروئے کار لائے جا رہے ہیں۔
