جہلم: رمضان المبارک کی آمد کے ساتھ ہی شہر سمیت ضلع بھر کے بازاروں اور دکانوں میں اشیائے خوردونوش اور روزمرہ ضروریات کی قیمتوں میں اچانک اضافہ دیکھنے میں آ رہا ہے۔ دکانداروں نے نہ صرف ازخود قیمتوں میں اضافہ کر دیا ہے بلکہ آئندہ ہفتے مزید مہنگائی کا عندیہ بھی دے دیا ہے، جس کے باعث شہریوں میں شدید تشویش پائی جاتی ہے۔
مارکیٹ میں رمضان المبارک میں استعمال ہونے والی سحری اور افطار کی اشیاء کی قیمتوں میں بے تحاشا اضافہ کردیا گیا ہے۔ بیسن جو پہلے 360 روپے فی کلو فروخت ہو رہا تھا، اب 430 روپے فی کلو میں دستیاب ہے، جبکہ سفید چنے 335 روپے سے بڑھ کر 370 روپے فی کلو فروخت کیے جا رہے ہیں۔ دال چنا کی قیمت 360 سے بڑھ کر 390 روپے فی کلو ہو چکی ہے، اور چاول جو پہلے 265 روپے فی کلو دستیاب تھا، اب 310 روپے فی کلو میں فروخت ہو رہا ہے۔
گوشت اور دودھ کی قیمتوں میں بھی اضافہ دیکھنے میں آیا ہے، مرغی کا گوشت 597 روپے فی کلو سے بڑھ کر 620 روپے فی کلو ہو گیا ہے، جبکہ دودھ 180 روپے فی لیٹر کی بجائے 210 روپے فی لیٹر میں فروخت ہو رہا ہے۔ سبزیوں میں بھی بے تحاشہ اضافہ کیا گیا ہے، آلو 52 روپے سے بڑھ کر 60 روپے فی کلو، پیاز 72 روپے سے 90 روپے فی کلو، ادرک 375 سے 430 روپے فی کلو اور لہسن 612 روپے سے بڑھ کر 660 روپے فی کلو ہو چکا ہے۔
مٹر 55 روپے سے 80 روپے فی کلو، کھیرا 77 روپے سے 90 روپے فی کلو، جبکہ گوبھی 24 روپے سے بڑھ کر 50 روپے فی کلو میں فروخت کی جا رہی ہے۔ اسی طرح لیموں 117 روپے سے بڑھ کر 150 روپے فی کلو، گاجر 27 روپے سے 40 روپے فی کلو اور سبز مرچ 105 روپے سے بڑھ کر 150 روپے فی کلو ہو چکی ہے۔
پھلوں کی قیمتوں میں بھی ہوشربا اضافہ دیکھنے میں آ رہا ہے، سیب 230 روپے سے بڑھ کر 330 روپے فی کلو، انگور 325 روپے سے 425 روپے فی کلو، امرود 182 روپے سے 250 روپے فی کلو، کینو 310 روپے فی درجن سے بڑھ کر 400 روپے فی درجن، کیلا 220 روپے فی درجن سے بڑھ کر 280 روپے فی درجن، اسٹرابری 490 روپے سے 600 روپے فی کلو اور انار 455 روپے سے بڑھ کر 530 روپے فی کلو فروخت کیا جا رہا ہے۔
دوسری جانب ضلعی انتظامیہ اور پرائس کنٹرول مجسٹریٹس مہنگائی کو کنٹرول کرنے میں مکمل طور پر ناکام دکھائی دے رہے ہیں۔ کارروائی کے نام پر صرف ریڑھی بانوں کو جرمانے کیے جا رہے ہیں جبکہ بڑے دکانداروں کو کھلی چھوٹ دے دی گئی ہے، جنہوں نے لوٹ مار کا بازار گرم کر رکھا ہے۔
شہریوں نے وزیراعلیٰ پنجاب، کمشنر راولپنڈی اور ڈپٹی کمشنر جہلم سے مطالبہ کیا ہے کہ ذخیرہ اندوزوں اور ناجائز منافع خوروں کے خلاف سخت کارروائی کی جائے اور اشیائے ضروریہ کی قیمتوں کو کنٹرول کیا جائے تاکہ رمضان المبارک کے دوران عوام کو ریلیف فراہم کیا جا سکے۔
