جہلم: ضلع جہلم کے بڑے تعلیمی اداروں میں بجلی کا بحران سنگین صورتحال اختیار کر گیا ہے۔
تفصیلات کے مطابق جہلم کے گورنمنٹ ہائی اسکول، ڈی پی ایس اسکول اور ایم سی پرائمری اسکول گزشتہ چار روز سے ٹرانسفارمر خراب ہونے کے باعث بجلی سے محروم ہیں، جس کے نتیجے میں ہزاروں طلبا و طالبات اور اساتذہ شدید مشکلات کا سامنا کر رہے ہیں۔
شدید گرمی کے موسم میں بجلی کی عدم دستیابی کے باعث کلاس رومز تندور کا منظر پیش کرنے لگے ہیں۔ پنکھے بند ہونے اور حبس بڑھنے سے طلبا کو تعلیمی سرگرمیاں جاری رکھنے میں شدید دشواری کا سامنا ہے، جبکہ اساتذہ بھی پریشانی میں مبتلا ہیں۔
ذرائع کے مطابق بجلی نہ ہونے کے باعث پینے کے پانی کی فراہمی بھی متاثر ہو چکی ہے، جس سے طلبا و طالبات کو مزید مشکلات پیش آ رہی ہیں۔ والدین نے صورتحال پر شدید تشویش کا اظہار کرتے ہوئے کہا ہے کہ شدید گرمی میں بچوں کی تعلیم کے ساتھ ساتھ ان کی صحت بھی متاثر ہو رہی ہے۔
ذرائع کا کہنا ہے کہ متعلقہ اداروں کو متعدد بار شکایات درج کروانے کے باوجود خراب ٹرانسفارمر کی مرمت یا تبدیلی کے لیے تاحال مؤثر اقدامات نہیں کیے جا سکے۔
شہریوں، والدین اور اساتذہ نے چیف ایگزیکٹو آفیسر ایجوکیشن، ضلعی انتظامیہ اور واپڈا حکام سے فوری نوٹس لینے کا مطالبہ کرتے ہوئے کہا ہے کہ تعلیمی اداروں میں بجلی کی فوری بحالی کے لیے ہنگامی بنیادوں پر اقدامات کیے جائیں تاکہ طلبا و طالبات کو مزید مشکلات اور تعلیمی نقصان سے بچایا جا سکے۔
