دینہ: میونسپل کمیٹی دینہ میں 25 دسمبر کے موقع پر بانی پاکستان قائداعظم محمد علی جناحؒ کے یومِ پیدائش اور کرسمس کی مناسبت سے ایک پروقار تقریب کا انعقاد کیا گیا۔
تقریب کی مہمانِ خصوصی اسسٹنٹ کمشنر دینہ، سعدیہ حسین ڈوگر تھیں جنہوں نے مسیحی برادری کے ہمراہ کیک کاٹا اور نقد انعامات تقسیم کیے۔
تقریب کے دوران اسسٹنٹ کمشنر سعدیہ حسین ڈوگر نے قائداعظم کی قیادت اور بصیرت کو خراجِ تحسین پیش کرتے ہوئے کہا کہ ان کی انتھک محنت اور اصولوں کی بدولت پاکستان کا خواب حقیقت بنا۔
انہوں نے مزید کہا کہ قائداعظم نے برصغیر کے مسلمانوں کو ایک آزاد وطن حاصل کرنے کے لیے جدوجہد کا راستہ دکھایا، اور ہر سال 25 دسمبر کو ان کی خدمات کو یاد کرتے ہوئے قومی جذبے کے ساتھ یومِ پیدائش منایا جاتا ہے۔
تقریب میں ملک کی سلامتی اور ترقی کے لیے خصوصی دعا کی گئی اور مسیحی برادری کو کرسمس کی مبارکباد دیتے ہوئے ان کی خوشیوں میں برابر کا شریک ہونے کا عزم ظاہر کیا گیا۔
اس موقع پر میونسپل کمیٹی میں کام کرنے والے مسیحی ملازمین میں نقد رقوم تقسیم کی گئیں۔
تقریب میں ایم او آئی سہیل اشرف، محمد امجد، رضوان سیٹھی، ماجد آفریدی، محمد فیصل اور دیگر معزز شخصیات نے شرکت کی۔
