دینہ میں فلسطینی عوام سے اظہارِ یکجہتی کے لیے فارابی فاؤنڈیشن ہائی اسکول جی ٹی روڈ دینہ کے طلباء بھی میدان میں آ گئے۔ طلباء کی بڑی تعداد نے بینرز اور فلسطینی جھنڈے اٹھا کر ریلی نکالی اور اسرائیلی مظالم کے خلاف شدید احتجاج کیا۔
ریلی میں شریک طلباء نے "تیرا میرا رشتہ کیا؟ لا الہ الا اللہ” اور دیگر پرجوش نعرے لگائے جن سے فضا گونج اٹھی۔ ریلی کے شرکاء نے فلسطینی عوام پر جاری اسرائیلی بربریت، بمباری اور محاصروں کے خلاف شدید غم و غصے کا اظہار کیا۔
ریلی سے خطاب کرتے ہوئے اسکول کے اساتذہ اور مقررین نے کہا کہ فلسطین میں نہتے بچوں، عورتوں اور بزرگوں پر ڈھائے جانے والے مظالم انسانیت کے چہرے پر بدنما داغ ہیں۔ انہوں نے کہا کہ امت مسلمہ اور عالمی برادری کو چاہیے کہ وہ ان مظالم کے خلاف فوری اور مؤثر اقدامات کرے اور مظلوم فلسطینی عوام کا ساتھ دے۔
مقررین نے اس عزم کا اظہار کیا کہ ہم ہر فورم پر فلسطینی بھائیوں کے ساتھ کھڑے ہیں اور ان کی آواز بننے کا سلسلہ جاری رکھیں گے۔ انہوں نے پاک فوج کو بھی خراجِ تحسین پیش کرتے ہوئے کہا کہ ہماری بہادر اور قربانیوں سے سرشار افواجِ پاکستان نے ہر محاذ پر ملک و ملت کا دفاع کیا ہے۔ قوم اپنی فوج کے ساتھ سیسہ پلائی دیوار کی طرح کھڑی ہے اور ان کی پیشہ ورانہ مہارت، قربانیوں اور عزم کو سلام پیش کرتی ہے۔
ریلی کے اختتام پر طلباء اور اساتذہ نے فلسطینی عوام کے حقِ آزادی، خود ارادیت اور جدوجہدِ آزادی کی بھرپور حمایت کا اعلان کیا اور مظلومین کے لیے خصوصی دعائیں کی گئیں۔
