دینہ میں معمولی تلخ کلامی کے بعد فائرنگ کے واقعے میں دو افراد شدید زخمی ہو گئے۔
تفصیلات کے مطابق گزشتہ روز جہلم کی تحصیل دینہ میں اقبال ٹاؤن سبزی منڈی روڈ پر مبینہ طور پر عدنان عرف دانی سکنہ ریتلی نے فائرنگ کرکے شکیل احمد اور شبیر حسین کو شدید زخمی کر دیا۔ فائرنگ کے نتیجے میں دونوں افراد زخمی ہوئے جنہیں فوری طور پر رورل ہیلتھ سنٹر دینہ منتقل کیا گیا۔
بعد ازاں زخمی شکیل احمد کی حالت کے پیش نظر اسے مزید طبی علاج کے لیے ڈسٹرکٹ ہیڈ کوارٹر ہسپتال جہلم منتقل کر دیا گیا۔
واقعے کی اطلاع ملتے ہی چوکی سٹی دینہ اور تھانہ دینہ پولیس نے موقع پر پہنچ کر تفتیش شروع کر دی۔ پولیس کی جانب سے فائرنگ کے واقعے کے محرکات اور ملزم کی گرفتاری کے لیے تحقیقات جاری ہیں۔
ابتدائی طور پر فائرنگ کی وجہ سابقہ رنجش بتائی جا رہی ہے، تاہم واقعے کے اصل حقائق پولیس کی تفتیش مکمل ہونے کے بعد سامنے آئیں گے۔
