دینہ میں پاک چین دوستی کے 75 سال مکمل ہونے کے موقع پر اسسٹنٹ کمشنر آفس اور میونسپل کمیٹی پارک دینہ میں پروقار تقریبات کا انعقاد کیا گیا، جہاں پاک چین دوستی کو خراج تحسین پیش کرتے ہوئے دونوں ممالک کے مضبوط تعلقات کو اجاگر کیا گیا۔
تقریبات کے دوران پاکستان اور چین کے قومی پرچم لہرائے گئے جبکہ دونوں ممالک کے قومی ترانے بھی بجائے گئے۔ اس موقع پر سرکاری افسران، سماجی شخصیات اور شہریوں کی بڑی تعداد نے شرکت کی۔
تفصیلات کے مطابق تقریب میں مقررین نے خطاب کرتے ہوئے کہا کہ پاکستان اور چین کی دوستی وقت کے ساتھ مزید مضبوط ہوئی ہے اور دونوں ممالک ہر مشکل گھڑی میں ایک دوسرے کے شانہ بشانہ کھڑے رہے ہیں۔
اس موقع پر اسسٹنٹ کمشنر دینہ محمد تیمور خان، چیف آفیسر میونسپل کمیٹی دینہ محمد فیصل اور نائب تحصیلدار محمد عمران نے قومی پرچم لہرایا اور دونوں ممالک کی قیادت کو خراج تحسین پیش کیا۔
شرکاء نے پاک چین دوستی کے فروغ اور دونوں ممالک کے درمیان تعاون کو مزید مضبوط بنانے کیلئے نیک تمناؤں کا اظہار بھی کیا۔
