جہلم: ڈپٹی کمشنر سید محمد میثم عباس کی ہدایات پر وزیر اعلی پنجاب مریم نواز شریف کے ویژن کے مطابق ستھرا پنجاب پروگرام جہلم بھر میں کامیابی سے جاری ہے۔ جہلم تحصیل کے اسسٹنٹ کمشنر اور میونسپل کمیٹی کے افسران ستھرا پنجاب پروگرام کے تحت شہر، قصبوں اور دیہاتوں کو صاف ستھرا اور دلکش بنانے کے لیے میدان میں متحرک ہیں۔
سی ای او راولپنڈی ویسٹ مینجمنٹ کمپنی اور اسسٹنٹ کمشنر علی الصبح روزانہ کی بنیاد پر ستھرا پنجاب پروگرام کو عملی جامہ پہنانے کے لیے صفائی ستھرائی کے آپریشنز کی نگرانی کر رہے ہیں۔
ڈپٹی کمشنر سید محمد میثم عباس نے کہا کہ عوام کو بہترین میونسپل سروسز فراہم کرنے اور ناجائز تجاوزات کے خاتمے کے لیے تمام مشینری و عملہ ضلع بھر میں متحرک ہے۔ سڑکوں، گلیوں، محلوں اور دیگر عوامی مقامات کی صفائی کی مانیٹرنگ کی جا رہی ہے اور متعلقہ محکموں کے افسران کو صفائی ستھرائی اور عوامی شکایات کے فوری ازالے کے لیے فیلڈ میں مزید تیزی لانے کی ہدایت کی گئی ہے تاکہ ستھرا پنجاب پروگرام کے تحت شہری و دیہی علاقوں میں نمایاں بہتری لائی جا سکے۔
پارکس، گرین بیلٹس، چوک چوراہے سرسبز و شاداب دکھائی دیں گے۔ اس کے علاوہ میونسپل کمیٹی کا عملہ سیوریج لائنوں، واٹر ڈسپوزلز کی صفائی اور گٹروں کو ڈھکن لگانے کا کام بھی باقاعدگی سے جاری رکھے ہوئے ہے۔
ڈپٹی کمشنر نے شہریوں سے اپیل کرتے ہوئے کہا کہ اس مشن میں وہ بھی صفائی عملے کے ساتھ تعاون کریں اور کوڑا کرکٹ صفائی عملے کے حوالے کریں۔ انہوں نے مزید کہا کہ ضلعی انتظامیہ کی اولین ترجیح یہ ہے کہ ستھرا پنجاب پروگرام کے تحت شہر کو صاف ستھرا بنانے کے بعد عوام کو اچھا ماحول فراہم کیا جائے۔
