جہلم شہر کا اکلوتا الطاف پارک کھنڈرات کا منظر پیش کرنے لگا، جھولے غائب، شہریوں کے بیٹھنے کے لیے رکھے گئے بینچ ٹوٹ پھوٹ کا شکار ہو گئے ، پارک میں آنے والے شہریوں کو سخت مایوسی کا سامنا ہے۔
الطاف پارک جو کہ شہریوں کی تفریح کے لئے سابق گورنر پنجاب چوہدری الطاف حسین مرحوم کے نام سے منسوب کر کے تعمیر کیا گیاتھا، جس کے اندر بچوں کی کھیل کود کے لیے لاکھوں روپے مالیت کے جھولے وغیرہ لگائے گئے تھے ،جو اب غائب ہو چکے ہیں۔
شہریوں کے بیٹھنے کیلئے جگہ جگہ بنچ بھی نصب کیے گئے لیکن میونسپل کمیٹی کے عملے کی عدم توجہی اور دیکھ بھال نہ ہونے کے باعث یہ پارک ویران اور اجاڑ کا منظر پیش کر رہا ہے پارک میں لگے جھولے غائب ہو چکے ہیں جبکہ شہریوں کے بیٹھنے کیلئے نصب کئے گئے بینچ بھی ٹوٹ پھوٹ کا شکار ہو چکے ہیں۔
پارک کے اندر ہر طرف گندگی پھیلی ہوئی ہے ، الطاف پارک کے اندر خود رو جھاڑیاں چھانگا مانگا جنگل کی منظر کشی کر رہی ہیں قریبی آبادیوں کے مکین اپنے مال مویشی پارک کے اندر باند ھ دیتے ہیں، جس کی وجہ سے مویشیوں کے گوبر کی وجہ سے پارک کے اندر تعفن اور بدبو سے تفریح کے لیے آنے والے شہریوں کو سخت مشکلات کا سامنا کرنا پڑتا ہے۔
پارک کے اندر اور داخلی دروازے پر لگائے گئے سی سی ٹی وی کیمرے لائٹس ،لوہے کے پول وغیرہ غائب ہو چکے ہیں واکنگ ٹریک پر لگائی گئی اینٹیں محلے دار اکھاڑ کر لے جا چکے ہیں جبکہ پارک کے اندر تعمیر کیے گئے ،کمرے وغیرہ بھی ٹوٹ پھوٹ کا شکار ہو چکے ہیں۔
شہریوں نے نگران وزیر اعلی پنجاب ،چیف سیکرٹری پنجاب سے مطالبہ کیاہے کہ الطاف پارک کی تزینن وآرائش اور جھولے وغیرہ نصب کئے جائیں تاکہ بچے صحت مند سرگرمیاں جاری رکھ سکیں اور عوام کو سیرو تفریح کے مواقع میسر آسکیں۔
