جہلم: تھانہ سول لائنز پولیس نے بروقت کارروائی کرتے ہوئے 5 سالہ بچے کو بحفاظت بازیاب کرلیا، جبکہ 5 سالہ بچے کو حبسِ بے جا میں رکھنے، تشدد کرنے اور اغوا کی جھوٹی اطلاع دے کر پولیس کو گمراہ کرنے کے مقدمے میں 2 خواتین سمیت 4 ملزمان کو گرفتار کرلیا۔
ترجمان جہلم پولیس کے مطابق ایمرجنسی 15 پر کال موصول ہونے پر تھانہ سول لائنز پولیس نے فوری رسپانس کیا اور کارروائی کرتے ہوئے پانچ سالہ بچے کو حبسِ بے جا میں رکھنے اور تشدد کرنے والے ملزمان کو گرفتار کرلیا۔
پولیس کے مطابق ملزمان نے پانچ بچے کے اغوا کی جھوٹی کال کرکے پولیس کو گمراہ کرنے کی کوشش کی، تاہم پولیس ٹیم نے فوری کارروائی کرتے ہوئے بچے کو بحفاظت بازیاب کرلیا۔
گرفتار ملزمان کے خلاف قانون کے مطابق مقدمہ درج کرکے مزید تفتیش جاری ہے۔ بچے کے لواحقین نے بروقت کارروائی پر جہلم پولیس کا شکریہ ادا کرتے ہوئے پولیس افسران و اہلکاروں کے لیے دعاؤں کا اظہار کیا۔
ڈی پی او جہلم شفیق احمد چوہدری نے کہا کہ ایمرجنسی 15 کی ہر کال پر فوری رسپانس اور شہریوں کی جان و مال کا تحفظ جہلم پولیس کی اولین ترجیح ہے۔ انہوں نے کہا کہ شہریوں خصوصاً بچوں کے تحفظ کو یقینی بنانے کے لیے قانون کے مطابق مؤثر کارروائیاں جاری رکھی جائیں گی۔
