جہلم: خیرالناس تنظیم جادہ جہلم کے زیرِ اہتمام گورنمنٹ نور مدرسہ البنات سکول میں ایک پروقار تقریب کا انعقاد کیا گیا، جس میں یتیم بچوں کی حوصلہ افزائی اور ان کی تعلیمی معاونت کیلئے خصوصی تعلیمی وظائف تقسیم کیے گئے۔
تقریب میں مختلف شعبہ ہائے زندگی سے تعلق رکھنے والی شخصیات نے شرکت کی اور بچوں کی تعلیم و تربیت کے فروغ کیلئے اپنے عزم کا اظہار کیا۔
تقریب کی مہمانِ خصوصی ڈسٹرکٹ ایجوکیشن آفیسر ایلیمنٹری میڈم عطیہ حمید تھیں، جبکہ اسسٹنٹ ایجوکیشن آفیسر عنبرین سلطانہ اور ہیڈ مسٹریس فرحت کیانی نے تقریب کے شاندار انتظامات کیے، جنہیں شرکاء نے بے حد سراہا۔
اپنے خطاب میں مقررین نے کہا کہ یتیم بچوں کی تعلیم پر سرمایہ کاری دراصل معاشرے کے روشن مستقبل میں سرمایہ کاری ہے اور ایسے فلاحی اقدامات معاشرے میں احساسِ ذمہ داری، خدمتِ خلق اور تعلیمی شعور کو فروغ دیتے ہیں۔
انہوں نے اس عزم کا اظہار کیا کہ مستحق اور نادار بچوں کی تعلیمی معاونت کا سلسلہ آئندہ بھی جاری رکھا جائے گا۔
اس موقع پر ڈی ای او ایلیمنٹری میڈم عطیہ حمید نے عرفان راجپوت، ڈائریکٹر پروگرام اینڈ پالیسی مسلم چیریٹی یو کے، اور خیرالناس تنظیم کے جنرل سیکرٹری انعام الحق کی سماجی، تعلیمی اور فلاحی خدمات کے اعتراف میں انہیں تعریفی شیلڈز سے نوازا۔
تقریب کے دوران بچوں نے بھی تعلیمی میدان میں مزید محنت اور نمایاں کامیابیاں حاصل کرنے کے عزم کا اظہار کیا۔
تقریب میں خیرالناس تنظیم کے صدر تسنیم اصغر، چیف پیٹرن شاویز مظفر، عبدالغفور چوہان سمیت دیگر معزز شخصیات نے شرکت کی۔
شرکاء نے خیرالناس تنظیم کی یتیم اور مستحق بچوں کی فلاح و بہبود کیلئے جاری خدمات کو سراہتے ہوئے امید ظاہر کی کہ تعلیم کے فروغ اور معاشرتی بہتری کیلئے ایسے فلاحی اقدامات مستقبل میں بھی تسلسل کے ساتھ جاری رہیں گے۔
