سوہاوہ میں پولیس مقابلہ، اے این ایف کا جوان زخمی، دو ملزمان گرفتار، ایک فرار

سوہاوہ کے قریب جی ٹی روڈ پر اینٹی نارکوٹکس نے کروڑوں روپے مالیت کی منشیات سمگلنگ کرنے کی کوشش ناکام بنا دی ، اینٹی نارکوٹکس گاڑی کو پکڑنے کے لیے پہنچی تو ملزمان نے اینٹی نارکوٹکس کی ٹیم پر فائرنگ شروع کر دی اور منشیات سے بھری کار چھوڑ کر فرار، ایک اے این ایف کا ملازم زخمی جبکہ اینٹی نارکوٹکس نے 2ملزمان کو گرفتار کر لیا جبکہ ایک ملزم بھاگنے میں کامیاب ، اطلاع ملتے ہی مختلف تھانوں کی بھاری نفری بھی موقع پر پہنچ گئی اور ملزم کی تلاش جاری ہے۔

تفصیلات کے مطابق جمعرات کے روز پشاور کی طرف سے آنے والی کروڑوں روپے مالیت کی منشیات سے بھری مہران کا ر منشیات سمگلنگ کے لیے آ رہی تھی کہ اسلام آباد اینٹی نارکوٹکس کو اطلاع ملی جنہوں نے ترکی ٹول پلازہ سوہاوہ کے مقام پر کار کو گھیر لیا اور رکنے کا اشارہ کیا تو ملزمان نے کار کو بھگا لیا۔

ڈومیلی موڑ کے مقام سوہن داتا پر اینٹی نارکوٹکس نے گاڑی کو پکڑ لیا اور گاڑی سیدھا ملزمان کی گاڑی کے ساتھ جا ٹکرائی جس پر ملزمان نے باہر نکلتے ہی اینٹی نارکوٹکس پر حملہ کر دیا جس سے اینٹی نارکوٹکس کا ایک ملازم شدید زخمی ہو گیا جبکہ جوابی کارروائی میں ملزمان نے بھاگنے کی کوشش کی تو اینٹی نارکوٹکس نے 2ملزمان کو گرفتار کر لیا جبکہ ایک ملزم فرار ہونے میں کامیاب ہو گیا۔

اے این ایف حکام نے جہلم پولیس کو وائرلیس کر کے امداد کیلئے طلب کر لیا۔ واقعہ کی اطلاع ملتے ہی اینٹی نارکوٹکس دینہ کی بھی ٹیم، پولیس تھانہ سوہاوہ ، پولیس تھانہ ڈومیلی ، پولیس تھانہ دینہ ، پٹرولنگ پولیس اور ڈی ایس پی سمیت بھاری نفری موقع پر پہنچ گئی اور علاقہ کی ناکہ بندی کرتے ہوئے بھاگنے والے ملزم کی تلاش شروع کر دی۔

اینٹی نارکوٹکس نے منشیات سے بھری مہران کار اپنے قبضہ میں لے لیا جس میں بتایا جاتا ہے کہ کروڑوں روپے مالیت کی منشیات سمگلنگ کی جا رہی تھی۔