جہلم: ڈپٹی کمشنر جہلم میثم عباس کی زیر صدارت پرائس کنٹرول کمیٹی کا اجلاس منعقد ہوا، جس میں ماہ رمضان کے دوران قیمتوں کو کنٹرول کرنے کے حوالے سے حکمت عملی طے کی گئی۔
انہوں نے اجلاس سے خطاب کرتے ہوئے کہا کہ رمضان المبارک کے مقدس مہینے میں عوام کو خود ساختہ مہنگائی اور ناجائز منافع خوری سے بچانا اولین ترجیح ہے، اس کے لیے ضلعی انتظامیہ متحرک کردار ادا کرے گی۔
اجلاس میں پرائس کنٹرول مجسٹریٹس نے فروری کے دوران کی گئی کارروائیوں، انسپکشنز، جرمانوں اور دیگر اقدامات کے حوالے سے تفصیلی بریفنگ دی۔ رپورٹ میں بتایا گیا کہ ضلع بھر میں زائد قیمتیں وصول کرنے، سرکاری نرخ نامے آویزاں نہ کرنے اور مقرر کردہ نرخوں کی خلاف ورزی کرنے والے دکانداروں کے خلاف درجنوں کارروائیاں کی گئیں۔ پرائس کنٹرول مجسٹریٹس اشیائے خوردونوش کی سرکاری قیمتوں پر عملدرآمد یقینی بنانے کے لیے مسلسل نگرانی کر رہے ہیں۔
ڈپٹی کمشنر میثم عباس نے اس موقع پر واضح ہدایات جاری کرتے ہوئے کہا کہ ماہ رمضان میں قیمتوں میں اضافہ ایک معمول بن چکا ہے، جسے روکنے کے لیے سخت اقدامات کیے جائیں گے۔ انہوں نے تمام پرائس مجسٹریٹس کو ہدایت دی کہ وہ مارکیٹوں میں مسلسل موجود رہیں اور مقررہ نرخوں پر اشیائے ضروریہ کی فروخت یقینی بنانے کے لیے مؤثر کارروائیاں کریں۔
انہوں نے مزید کہا کہ خلاف ورزی کرنے والوں کے خلاف سخت قانونی کارروائی عمل میں لائی جائے گی، جس میں بھاری جرمانوں کے ساتھ دکانوں کو سیل کرنے اور ایف آئی آر درج کرنے جیسے اقدامات شامل ہوں گے۔
ضلعی انتظامیہ نے عوام سے بھی اپیل کی کہ وہ زائد قیمتوں اور ناجائز منافع خوری کی اطلاع فوری طور پر متعلقہ حکام کو دیں تاکہ بروقت کارروائی کی جا سکے۔
