جہلم شہر اور گردونواح میں تجاوزات مافیا کا قبضہ، شہر کے بازاروں اور سڑکوں کے ارد گرد قائم تجاوزات کے خلاف آپریشن نہ ہوسکا۔ سڑکیں اور بازار تنگ گلیوں میں تبدیل ہو گئے، شہریوں کو آمد و رفت میں مشکلات کاسامنا ہے۔
تفصیلات کے مطابق جہلم شہر کی سڑکیں، بازار، فٹ پاتھ اور گلیاں تجاوزات اور غیر قانونی پارکنگ کی زد میں ہیں۔ شہر کی سڑکوں، بازار اور فٹ پاتھ پر تجاوزات کنندگان اور قبضہ گروپوں نے دوکانیں سجا رکھی ہیں جبکہ بازاروں اور گلیوں میں موٹر سائیکل رکشوں اور موٹر سائیکلوں کے غیر قانونی سٹینڈ قائم کر دیئے گئے ہیں۔
رہی سہی کسرلوڈر رکشہ، ریڑھی اور چھابڑی وفروٹ فروشوں نے پوری کر دی ہے جو آمد ورفت میں مسائل پیدا کر رہے ہیں۔ خریداری کے لیے شہر آنے والوں اور راہگیروں کا بازاروں میں سے گزرنا دشوار ہو کر رہ گیا ہے، جن کو کوئی سرکاری محکمہ پوچھنے والا نہیں۔
مقامی شہریوں نے وزیر اعلی پنجاب، چیف سیکرٹری پنجاب اور سیکرٹری بلدیات سے اصلاح احوال کا مطالبہ کیا ہے۔
