سوہاوہ: ڈپٹی کمشنر جہلم میر رضا اوزگن نے تحصیل سوہاوہ کا تفصیلی دورہ کیا، جہاں انہوں نے سوہاوہ مین بازار کی بیوٹیفیکیشن اسکیم کی پیشرفت کا معائنہ کیا۔ اس موقع پر اسسٹنٹ کمشنر سوہاوہ غزالہ اصغر اور چیف آفیسر میونسپل کمیٹی اختر اسلام بھی ان کے ہمراہ موجود تھے۔
ڈپٹی کمشنر نے جاری ترقیاتی کاموں کے ہر پہلو اور تکنیکی جزئیات کا باریک بینی سے جائزہ لیا تاکہ کام کے معیار کو یقینی بنایا جا سکے۔ انہوں نے بازار کی تزئین و آرائش، فٹ پاتھوں کی تعمیر، اسٹریٹ لائٹس کی تنصیب اور دیگر انتظامی امور کا بھی معائنہ کیا۔
میر رضا اوزگن نے اسسٹنٹ کمشنر غزالہ اصغر اور چیف آفیسر اختر اسلام کو ہدایت کی کہ جہاں کہیں بہتری کی گنجائش موجود ہو، وہاں فوری اصلاحی اقدامات کیے جائیں تاکہ منصوبہ جدید شہری تقاضوں اور عوامی ضروریات کے مطابق مکمل ہو سکے۔
انہوں نے واضح کیا کہ سوہاوہ مین بازار کی بیوٹیفیکیشن شہریوں کو بہتر اور خوشگوار ماحول فراہم کرے گی۔ ڈپٹی کمشنر نے کام کی رفتار تیز کرنے کی ہدایت دیتے ہوئے زور دیا کہ معیار پر کسی صورت سمجھوتہ نہ کیا جائے اور تمام مراحل مقررہ وقت کے اندر مکمل کیے جائیں۔
