جہلم: پیٹرولیم مصنوعات کی قیمتوں میں حالیہ اضافے اور اشیائے ضروریہ کی مسلسل بڑھتی ہوئی قیمتوں نے شہریوں کی مشکلات میں مزید اضافہ کر دیا ہے، جبکہ عوام نے بڑھتی مہنگائی پر شدید تشویش کا اظہار کیا ہے۔
شہریوں کا کہنا ہے کہ روزمرہ استعمال کی اشیاء کی قیمتوں میں مسلسل اضافے کے باعث غریب اور سفید پوش طبقے کیلئے زندگی گزارنا انتہائی مشکل ہو چکا ہے۔
میڈیا نمائندگان سے گفتگو کرتے ہوئے شہریوں نے کہا کہ عالمی سطح پر ایران، امریکہ اور اسرائیل کے درمیان کشیدگی کے اثرات ضرور مرتب ہو رہے ہیں، تاہم پاکستان میں پیٹرول اور گیس کی فراہمی معاہدوں کے مطابق جاری ہے، اس کے باوجود قیمتوں میں اضافہ عوام کیلئے ناقابل برداشت بنتا جا رہا ہے۔
شہریوں کے مطابق مہنگائی نے عام آدمی کا جینا دوبھر کر دیا ہے اور گھریلو اخراجات پورے کرنا مشکل ہو گیا ہے۔ انہوں نے کہا کہ پیٹرولیم مصنوعات کی قیمتوں میں اضافے کے اثرات براہ راست ٹرانسپورٹ، خوراک اور دیگر ضروریاتِ زندگی پر پڑ رہے ہیں۔
عوامی حلقوں نے حکومت سے مطالبہ کیا ہے کہ مہنگائی پر قابو پانے، عوام کو ریلیف فراہم کرنے اور بنیادی اشیائے خوردونوش کی قیمتوں کو کنٹرول کرنے کیلئے فوری اور مؤثر اقدامات کیے جائیں۔
