پنڈ دادنخان: تھانہ للِہ کے علاقے میں چوری کی وارداتوں کا سلسلہ جاری ہے، جہاں چوروں نے ایک ہی رات میں چار دکانوں کے تالے توڑ کر قیمتی سامان لوٹ لیا۔
جہلم کی تحصیل پنڈدادنخان میں تھانہ للِہ کے علاقہ میں چوری کی واردات کے دوران مزاحمت کرنے پر سکیورٹی گارڈ کو شدید تشدد کا نشانہ بنایا گیا۔ زخمی سکیورٹی گارڈ کو فوری طور پر رورل ہیلتھ سینٹر للِہ منتقل کیا گیا، جہاں سے اسے مزید علاج کے لیے تحصیل ہیڈ کوارٹر اسپتال پنڈ دادنخان ریفر کر دیا گیا۔
چوروں نے للِہ اڈا مارکیٹ میں دیدہ دلیری کا مظاہرہ کرتے ہوئے موبائل شاپ، کریانہ سٹور، فارمیسی اور دیگر دکانوں سے قیمتی سامان چوری کیا۔ واردات کے دوران ایک دکان سے سولر سسٹم اور سی سی ٹی وی کیمرے بھی چرا لیے گئے۔
پولیس تھانہ للِہ نے مقدمات درج کرکے ملزمان کی تلاش شروع کر دی ہے۔ عوام میں خوف و ہراس پھیل چکا ہے جبکہ تاجروں نے سکیورٹی انتظامات کو بہتر بنانے کا مطالبہ کیا ہے۔
