جہلم: جامعہ علوم اثریہ جہلم کے زیرِ اہتمام مرکزی جامع مسجد اہلِ حدیث، چوک اہلِ حدیث میں سیرتِ شافعِ محشر ﷺ کانفرنس منعقد ہوئی، جس میں علماء کرام، طلبہ اور شہریوں کی بڑی تعداد نے شرکت کی۔
کانفرنس سے جامعہ کے مہتمم اور مرکزی جمعیت اہلِ حدیث پاکستان کے نائب امیر حافظ عبدالحمید عامر، ڈاکٹر طیب الرحمن زیدی، علامہ محمد یحییٰ عارفی اور قاری محمد الیاس مدنی سمیت دیگر مقررین نے خطاب کیا۔
کانفرنس سے خطاب کرتے ہوئے حافظ عبدالحمید عامر نے کہا کہ دفاعِ صحابہؓ اور عظمتِ اہلِ بیتؓ کا پرچم آخری سانس تک بلند رکھا جائے گا۔ انہوں نے کہا کہ صحابہ کرامؓ وحیِ الٰہی کے اولین گواہ اور امین راوی ہیں، اس لیے ان کی شان میں طعن و تشنیع دینِ اسلام پر اعتراض کے مترادف ہے۔
انہوں نے کہا کہ اللہ تعالیٰ نے صحابہ کرامؓ کو اپنی رضا اور جنت کی بشارت عطا فرمائی، اس لیے ان مقدس ہستیوں کے احترام اور عظمت کا تحفظ ہر مسلمان کی ذمہ داری ہے۔ حافظ عبدالحمید عامر نے اس عزم کا اظہار کیا کہ صحابہ کرامؓ اور اہلِ بیتؓ کی عظمت و ناموس کے حوالے سے اپنا مؤقف بھرپور انداز میں پیش کرتے رہیں گے۔
عظمتِ توحید کے موضوع پر خطاب کرتے ہوئے ڈاکٹر طیب الرحمن زیدی نے کہا کہ اللہ تعالیٰ کے ساتھ شرک انتہائی سنگین جرم ہے۔ انہوں نے کہا کہ خالقِ کائنات کے خصوصی حقوق کسی مخلوق کو دینا توحید کے بنیادی تصور کے منافی ہے۔
انہوں نے کہا کہ دعوتِ اہلِ حدیث کا بنیادی محور توحیدِ الٰہی ہے اور مسلمان کو ہر حال میں اللہ تعالیٰ کی وحدانیت پر ثابت قدم رہنا چاہیے۔ ان کا کہنا تھا کہ اللہ تعالیٰ کے سوا کسی کے سامنے عبادت کے طور پر جھکنا درست نہیں۔
نامور خطیب علامہ محمد یحییٰ عارفی نے اپنے خطاب میں حضرت ابوبکر صدیقؓ کی حیات و خدمات کا ذکر کرتے ہوئے کہا کہ حضرت ابوبکر صدیقؓ نے اللہ کی رضا اور رسول اکرم ﷺ کی محبت میں بے مثال قربانیاں پیش کیں۔ انہوں نے کہا کہ صحابہ کرامؓ کے ایمان، کردار اور رسول اللہ ﷺ سے وفاداری کو سمجھنے کے لیے ان کی پوری زندگی کا مطالعہ ضروری ہے۔
قاری محمد الیاس مدنی نے کہا کہ اسوۂ نبوی ﷺ ہی وہ راستہ ہے جسے اختیار کرکے مسلم امہ اپنے سنہری دور کی طرف واپس لوٹ سکتی ہے۔ انہوں نے مسلمانوں پر زور دیا کہ وہ نبی کریم ﷺ کی سیرت و تعلیمات کو اپنی انفرادی اور اجتماعی زندگی کا حصہ بنائیں۔
واضح رہے کہ یہ کانفرنس جامعہ علوم اثریہ جہلم کے ششماہی امتحانات کے نتائج کے موقع پر منعقد کی گئی۔ جامعہ کے مدیر التعلیم مولانا عکاشہ مدنی نے نتائج کا اعلان کیا، جس کے مطابق شعبہ درسِ نظامی میں حافظ محمد شاذل نے پہلی، حافظ عبداللہ اقبال ڈار نے دوسری جبکہ محمد فائز نے تیسری پوزیشن حاصل کی۔
اس موقع پر جامعہ کے لیے ایک اہم اعزاز کا بھی ذکر کیا گیا کہ وفاق المدارس السلفیہ پاکستان کے سالانہ امتحان ثانویہ عامہ میں جامعہ کے طالب علم حافظ عبداللہ اقبال ڈار نے پورے پاکستان میں تیسری پوزیشن حاصل کی۔ اس کامیابی پر رئیس الجامعہ حافظ عبدالحمید عامر نے طالب علم کو اعزازی شیلڈ سے نوازا۔
کانفرنس کے اختتام پر شرکاء نے جامعہ علوم اثریہ کی جانب سے منعقدہ پروگرام کے انتظامات اور طلبہ کی تعلیمی کامیابیوں کو سراہا۔ تقریب میں علماء کرام، طلبہ اور شہریوں کی بڑی تعداد نے شرکت کی۔
