جہلم: ممبر قومی اسمبلی چوہدری فرخ الطاف اور سابق ممبر صوبائی اسمبلی چوہدری ندیم خادم نے ڈپٹی کمشنر دفتر میں مسیحی برادری کے مستحق افراد میں چیک تقسیم کرتے ہوئے کہا کہ پنجاب حکومت اقلیتوں کے حقوق کے تحفظ کے لیے بھرپور کوششیں کر رہی ہے۔ وزیر اعلیٰ پنجاب مریم نواز کا عزم ہے کہ اقلیتوں کے تمام مسائل کو حل کیا جائے گا۔
اس موقع پر ڈپٹی کمشنر جہلم محمد میثم عباس اور دیگر افسران بھی موجود تھے۔
چوہدری فرخ الطاف نے کہا کہ وزیر اعلیٰ پنجاب اقلیتوں کے حقوق کے لیے انقلابی اقدامات کر رہی ہیں اور ان کے ہر تہوار پر سہولیات فراہم کی جا رہی ہیں۔ اقلیتی برادری کو تمام حقوق اور سہولتیں فراہم کرنا حکومت کا اولین مقصد ہے۔
سابق ایم پی اے چوہدری ندیم خادم نے وزیر اعلیٰ پنجاب مریم نواز کے ویژن کو سراہا اور کہا کہ انہوں نے پنجاب کی تاریخ میں سب سے بڑا پیکج مسیحی برادری کو دیا ہے، جو ان کے حقوق کے تحفظ کے لیے ایک سنگ میل ہے۔
اس موقع پر کرسچن کمیونٹی کے افراد نے وزیر اعلیٰ پنجاب اور ڈپٹی کمشنر جہلم کا شکریہ ادا کیا۔ انہوں نے کہا کہ اس مالی امداد سے انہیں بہت مدد ملی ہے۔
