جہلم میں مختلف مذہبی، قومی اور اہم مواقع پر سخت گرمی، حبس اور سرد موسم کے باوجود بہترین انداز میں فرائض سرانجام دینے والی لیڈیز پولیس اہلکاروں کی حوصلہ افزائی کے لیے انہیں تعریفی سرٹیفکیٹس دیے جانے کی ضرورت پر زور دیا گیا ہے۔
شہری حلقوں کا کہنا ہے کہ محرم الحرام، یوم عاشورہ، چہلم، جشنِ آزادی 14 اگست، 12 ربیع الاول اور دیگر اہم مواقع پر خواتین پولیس اہلکار بھی سیکیورٹی اور دیگر ذمہ داریوں کی انجام دہی کے لیے کئی گھنٹوں تک ڈیوٹی سرانجام دیتی ہیں۔ ایسے میں ان کی محنت، ذمہ داری اور جذبۂ خدمت کو سراہنا ضروری ہے۔
شہریوں کے مطابق پولیس اہلکاروں کی حوصلہ افزائی سے ان کے حوصلے بلند ہوں گے اور وہ مزید ذمہ داری، محنت اور جذبۂ خدمت کے ساتھ اپنے فرائض انجام دیں گے۔
شہری حلقوں نے محکمہ پولیس کے اعلیٰ حکام کے ساتھ ساتھ جہلم کی سماجی، فلاحی اور شہری تنظیموں کے عمائدین سے بھی مطالبہ کیا ہے کہ پولیس افسران و اہلکاروں کی خدمات کو سراہنے کے لیے خصوصی تقریبات کا انعقاد کیا جائے اور نمایاں کارکردگی کا مظاہرہ کرنے والے اہلکاروں کو تعریفی اسناد سے نوازا جائے۔
