جہلم: ڈپٹی کمشنر جہلم میثم عباس نے گورنمنٹ جونیئر ماڈل سکول بلال ٹاؤن اور گورنمنٹ الطاف حسین ہائی سکول سول لائنز کا دورہ کیا، جہاں انہوں نے سکولوں میں جاری سمر کیمپ کی سرگرمیوں کا مشاہدہ کیا اور بنیادی سہولیات کا تفصیلی جائزہ لیا۔
ڈی سی میثم عباس نے سکولوں میں گرمیوں کی چھٹیوں کے دوران سٹاف کی حاضری کو یقینی بنانے کی ہدایت کی اور اس بات پر زور دیا کہ سکولوں میں صفائی، بجلی، پانی اور دیگر بنیادی سہولیات کی فراہمی میں کسی قسم کی کوتاہی برداشت نہیں کی جائے گی۔ انہوں نے کلاس رومز، لیبارٹریز اور دیگر تدریسی و غیر تدریسی شعبہ جات کا معائنہ بھی کیا۔
اس موقع پر ڈپٹی کمشنر نے پرنسپلز اور ٹیچنگ سٹاف سے ملاقات کی اور ان سے تعلیمی معیار، طلبہ کی شرکت، سمر کیمپ میں جاری سرگرمیوں اور درپیش مسائل کے حوالے سے معلومات حاصل کیں۔ انہوں نے اساتذہ کو ہدایت کی کہ وہ سمر کیمپ کو مفید اور مؤثر بنانے کے لیے اپنی تمام تر توانائیاں صرف کریں تاکہ طلبہ کی تعلیمی بہتری کو یقینی بنایا جا سکے۔
ڈی سی میثم عباس نے کہا کہ حکومت پنجاب کی ہدایات کے مطابق تعلیمی اداروں میں بہتری لانا ترجیح ہے، اور اس مقصد کے حصول کے لیے انتظامیہ پوری طرح متحرک ہے۔
