پنڈدادنخان: کھیوڑہ میں درندہ صفت شوہر نے اپنی بیوی کو مبینہ طور پر بدترین تشدد کا نشانہ بنا ڈالا، پولیس نے خاوند کو گرفتار کر لیا، دوسرا ملزم فرار ہو گیا۔
تفصیلات کے مطابق جہلم کی تحصیل پنڈدادنخان میں خرچہ مانگنے پر شوہر ارشد محمود نے گھر میں رکھے ہوئے لڑکے نصیب حسین سے مل کر اپنی پہلی بیوی رضوانہ بی بی کا مبینہ طور پر گلہ دباتے ہوئے بدترین تشدد کا نشانہ بنا ڈالا، خاتون تشدد کے باعث زخمی ہو گئی۔
ماڈرن کالونی کھیوڑہ کی رہائشی رضوانہ بی بی نے پولیس کو بتایا کہ جب سے شادی ہوئی خاوند خرچہ نہیں دیتا، پیسے مانگے تو خاوند نے گلہ دبایا اور منہ پر مکا مار میرا ہونٹ زخمی ہو گیا ۔ نصیب نامی لڑکے نے مجھے پکڑا اور میرے خاوند نے بدترین تشدد کیا، میرے جسم پر مختلف چوٹیں آئی ہیں۔
تھانہ پنڈدادنخان پولیس نے متاثرہ خاتون کی درخواست پر مقدمہ درج کر کے ملزم ارشد محمود کو گرفتار کر لیا جبکہ دوسرے ملزم کی تلاش شروع کر دی۔
متاثرہ خاتون نے میڈیا سے گفتگو کرتے ہوئے کہا کہ میرا خاوند بااثر ہے میری جان کو خطرہ ہے ۔ مجھ پر میرے خاوند اور اس کے رشتے داروں نے بدترین تشدد کیا اور گھر سے نکال دیا ہے۔ وزیر اعلیٰ پنجاب مریم نواز مجھے انصاف دلوائیں ورنہ خودکشی کر لوں گی۔
