جہلم: اسلام آباد الیکٹرک سپلائی کمپنی کے جہلم سرکل کی جانب سے ہر دوسرے روز اعلانیہ اور غیر اعلانیہ لوڈ شیڈنگ کے باعث کاروباری طبقہ اور شہری شدید پریشانی کا شکار ہیں۔
تفصیلات کے مطابق گزشتہ کئی ہفتوں سے آئیسکو سرکل جہلم کے بیشتر علاقوں میں دن اور رات کے مختلف اوقات میں بغیر کسی پیشگی اطلاع یا باقاعدہ شیڈول کے گھنٹوں بجلی بند کی جا رہی ہے۔ اس غیر متوقع لوڈ شیڈنگ کے باعث نہ صرف گھریلو صارفین متاثر ہو رہے ہیں بلکہ دکانداروں اور چھوٹے کاروباروں کو بھی شدید مالی نقصان کا سامنا ہے۔
متاثرہ شہریوں کا کہنا ہے کہ شدید سردی کے باعث بجلی کی کھپت ویسے ہی کم ہو چکی ہے، اس کے باوجود آئیسکو سرکل جہلم کے مختلف فیڈرز پر جب چاہا بجلی بند کر دی جاتی ہے، جس سے روزمرہ زندگی مفلوج ہو کر رہ گئی ہے۔
متاثرہ افراد نے وزیر اعظم پاکستان شہباز شریف اور وفاقی وزیر برائے پانی و بجلی سے مطالبہ کیا ہے کہ سردیوں میں اعلانیہ و غیر اعلانیہ لوڈ شیڈنگ کا فوری نوٹس لیا جائے اور اس کا خاتمہ کیا جائے، تاکہ محنت کش اور کاروباری طبقے کی مشکلات میں کمی واقع ہو سکے اور شہریوں کو بنیادی سہولت میسر آ سکے۔
