جہلم: ڈپٹی کمشنر جہلم میر رضا اوزگن کی زیر صدارت محکمہ صحت کا ایک اہم جائزہ اجلاس منعقد ہوا، جس میں ضلع بھر میں جاری حالیہ پولیو مہم کی پیش رفت اور کارکردگی کا تفصیلی جائزہ لیا گیا۔
اجلاس کے دوران محکمہ صحت کے افسران نے ڈپٹی کمشنر کو پولیو مہم کی تفصیلی بریفنگ دی، جس میں بتایا گیا کہ ٹیموں کی انتھک کوششوں کے باعث اب تک مہم کے 98 فیصد سے زائد ہدف کو کامیابی سے حاصل کر لیا گیا ہے۔ تاہم، باقی ماندہ بچوں تک رسائی کے لیے حکمت عملی پر بھی تبادلہ خیال کیا گیا۔
ڈپٹی کمشنر میر رضا اوزگن نے حاصل کردہ کامیابی پر اطمینان کا اظہار کیا، اور ساتھ ہی ہدایت جاری کی کہ قومی ذمہ داری کو مکمل طور پر پورا کیا جائے۔ انہوں نے واضح کیا کہ پولیو مہم کو مزید موثر اور نتیجہ خیز بنانے کے لیے تمام وسائل بروئے کار لائے جائیں اور زیر التواء اہداف کو جلد از جلد حاصل کیا جائے۔
ڈپٹی کمشنر نے زور دیا کہ کوئی بھی بچہ پولیو سے بچاؤ کے قطرے سے محروم نہیں رہنا چاہیے اور نگرانی کے نظام کو مزید سخت کیا جائے۔
