جہلم: 5 فروری یومِ یکجہتی کشمیر جوش و خروش سے منایا جائے گا۔ ضلعی انتظامیہ جہلم نے اس سلسلے میں تفصیلی پلان ترتیب دے دیا ہے۔
تفصیلات کے مطابق ملک بھر کی طرح ضلع جہلم میں بھی کشمیری عوام سے یکجہتی کے لیے مختلف پروگرام اور تقریبات کا انعقاد کیا جائے گا۔ ڈپٹی کمشنر جہلم میثم عباس کی ہدایت پر 5 فروری کے لیے ایک جامع پلان تیار کیا گیا ہے۔
5 فروری کے دن صبح 10 بجے ضلعی انتظامیہ، سماجی اداروں کے افسران و ملازمین اور رضاکاران ڈی سی دفتر میں جمع ہوں گے، جہاں سب سے پہلے پاکستان اور کشمیر کے قومی ترانے بجائے جائیں گے۔
بعدازاں کشمیری عوام سے اظہارِ یکجہتی کے طور پر ایک منٹ کی خاموشی اختیار کی جائے گی۔ تمام تحصیلوں میں الگ الگ تقریبات منعقد کی جائیں گی جبکہ سکولوں اور کالجوں میں یومِ یکجہتی کشمیر کے حوالے سے خصوصی تقاریب اور مباحثے ہوں گے۔
ڈپٹی کمشنر جہلم میثم عباس کی قیادت میں ایک ریلی بھی نکالی جائے گی، جس میں کشمیری عوام کے حقِ خود ارادیت کے لیے آواز بلند کی جائے گی۔ ضلع بھر میں کشمیری عوام کی جدوجہد آزادی کو اجاگر کرنے کے لیے پوسٹر اور بینر آویزاں کیے جائیں گے۔ اس کے علاوہ محکمہ سپورٹس کی زیرِ اہتمام مختلف کھیلوں کے مقابلوں کا انعقاد بھی کیا جائے گا۔
ضلعی انتظامیہ کا کہنا ہے کہ یومِ یکجہتی کشمیر کے پروگرامز کا مقصد کشمیری عوام کے حقوق کی حمایت اور ان کے ساتھ اظہار یکجہتی کرنا ہے۔
