جہلم: ڈپٹی کمشنر جہلم میر رضا اوزگن کی زیرِ صدارت انجمن تاجران کے نمائندوں کا ایک خصوصی اجلاس منعقد ہوا۔
اجلاس میں رمضان المبارک کے دوران اشیائے ضروریہ کی قیمتوں، دستیابی اور بازاروں کی صورتحال کا تفصیلی جائزہ لیا گیا۔ اجلاس میں شہر کی مختلف مارکیٹوں کے صدور اور انجمنِ تاجران کے عہدیداران نے شرکت کی۔
اجلاس سے خطاب کرتے ہوئے ڈپٹی کمشنر جہلم نے کہا کہ رمضان المبارک برکتوں اور رحمتوں کا مہینہ ہے، اس لیے تاجر برادری گراں فروشی سے مکمل اجتناب کرے اور عوام کو ریلیف فراہم کرنے میں ضلعی انتظامیہ کے ساتھ بھرپور تعاون کرے۔
انہوں نے واضح ہدایات جاری کیں کہ تمام دکاندار اپنی دکانوں پر سرکاری نرخ نامے نمایاں مقامات پر آویزاں کریں اور کسی بھی قسم کی مصنوعی قلت پیدا نہ کی جائے۔
ڈپٹی کمشنر میر رضا اوزگن نے واضح کیا کہ رمضان المبارک کے دوران ذخیرہ اندوزوں اور گراں فروشوں کے خلاف سخت اور بلاامتیاز کارروائی عمل میں لائی جائے گی۔
انہوں نے بتایا کہ تجاوزات اور گراں فروشی کے خاتمے کے لیے قائم فورس بازاروں میں مستقل گشت کرے گی تاکہ قیمتوں کے استحکام اور اشیائے ضروریہ کی وافر دستیابی کو یقینی بنایا جا سکے۔
اجلاس کے دوران انجمن تاجران کے عہدیداران نے ضلعی انتظامیہ کو یقین دہانی کرائی کہ وہ سرکاری ریٹ لسٹ پر مکمل عملدرآمد کو یقینی بنائیں گے اور رمضان المبارک میں عوام کو ہر ممکن سہولت فراہم کرنے میں انتظامیہ کا ساتھ دیں گے۔
