دینہ میں صفائی ورکرز کو بروقت تنخواہیں نہ ملنے پر احتجاجی ہڑتال کر دی گئی تاہم اسسٹنٹ کمشنر دینہ صفاء عابد کی بروقت کوشش اور یقین دہانی کے بعد صفائی ورکرز نے ہڑتال ختم کر دی۔
تفصیلات کے مطابق راولپنڈی ویسٹ مینجمنٹ کمپنی جسے حکومت پنجاب کی جانب سے صفائی کا ٹھیکہ دیا گیا تھا کی جانب سے دینہ کے صفائی ورکرز کو تنخواہیں بروقت نہ ملنے کے باعث ورکرز نے کام چھوڑ کر احتجاج شروع کر دیا۔ تمام صفائی ورکرز مین چوک میں اکٹھے ہو گئے اور تنخواہوں کی عدم ادائیگی کے خلاف شدید احتجاج کیا۔
احتجاج کی اطلاع ملتے ہی اسسٹنٹ کمشنر دینہ صفاء عابد موقع پر پہنچ گئیں اور صفائی ورکرز کے مسائل غور سے سنے۔ انہوں نے ورکرز کو یقین دہانی کرائی کہ ان کی تنخواہیں فوری طور پر ادا کی جائیں گی اور کسی کے ساتھ ناانصافی نہیں ہونے دی جائے گی۔
اسسٹنٹ کمشنر نے واضح کیا کہ دن 1 بجے تک تمام ورکرز کو تنخواہیں مل جائیں گی، جس کے بعد صفائی ورکرز نے احتجاج ختم کر دیا۔
بعد ازاں اسسٹنٹ کمشنر دینہ صفاء عابد کی یقین دہانی پر عمل درآمد کرتے ہوئے تمام ورکرز کو ان کی تنخواہوں کی ادائیگی کر دی گئی۔ تنخواہیں ملنے کے بعد صفائی ورکرز نے اسسٹنٹ کمشنر کے بروقت اقدام کو سراہتے ہوئے ان کا شکریہ ادا کیا۔
شہریوں نے بھی اسسٹنٹ کمشنر دینہ کے فوری اور مؤثر اقدام کی تعریف کی، جس کے باعث شہر میں صفائی کا نظام بحال ہو سکا اور ممکنہ مشکلات سے بچا جا سکا۔
