سوہاوہ: سوہاوہ ویلفیئر سوسائٹی اور شان رحمت ویلفیئر کی مشترکہ کاوش سے سیلاب متاثرین کے لیے امدادی قافلہ روانہ کر دیا گیا۔
اس سلسلے میں تقریب روانگی سے قبل امدادی کیمپ میں دعائیہ اجتماع منعقد کیا گیا جس میں ایس ایچ او سوہاوہ راجہ عمران، علامہ قاری عصمت اللہ سیالوی سمیت شہر کی سماجی، کاروباری اور سیاسی شخصیات نے شرکت کی۔
امدادی قافلے میں ساڑھے تین سو گھرانوں کے لیے راشن بیگ تیار کیے گئے ہیں جو جنوبی پنجاب کی تحصیل علی پور میں مقامی انتظامیہ کے تعاون سے متاثرین میں تقسیم کیے جائیں گے۔
اس موقع پر قاری عصمت اللہ سیالوی نے دعا کروائی اور کہا کہ سوہاوہ کے نوجوانوں کا خدمتِ خلق کا جذبہ لائق تحسین ہے۔ شہریوں کی جانب سے کارِ خیر میں بڑھ چڑھ کر حصہ لینا اس بات کی علامت ہے کہ مصیبت کی گھڑی میں سب متاثرہ بھائی بہنوں کے ساتھ کھڑے ہیں۔
ایس ایچ او راجہ عمران نے سوہاوہ ویلفیئر سوسائٹی کی کاوش کو سراہتے ہوئے کہا کہ ہمیں چاہیے کہ اپنے مصیبت زدہ بھائیوں کی مدد کے لیے آگے آئیں اور جہاں تک ممکن ہو اس کارِ خیر میں ہاتھ بٹائیں۔
