سوہاوہ: نور ویلفیئر سوسائٹی جہلم کے زیرِ اہتمام تحصیل سوہاوہ میں دکھی انسانیت کی خدمت اور سماجی فلاح کے سلسلے میں ایک پروقار تقریب کا انعقاد کیا گیا، جس کے دوران مستحق خاندانوں میں راشن بیگز تقسیم کیے گئے اور ٹی ایچ کیو ہسپتال سوہاوہ کو بچوں کے علاج کے لیے ضروری ادویات فراہم کی گئیں۔
تقریب اسسٹنٹ کمشنر سوہاوہ غزالہ اصغر کے دفتر میں منعقد ہوئی، جہاں نور ویلفیئر سوسائٹی جہلم کے جنرل سیکرٹری چوہدری فرحت کمال اور اسسٹنٹ کمشنر غزالہ اصغر نے اپنے ہاتھوں سے مستحق اور نادار شہریوں میں راشن بیگز تقسیم کیے اور ان کی داد رسی کی۔
فلاحی سرگرمیوں کے تسلسل میں نور ویلفیئر سوسائٹی کے وفد نے تحصیل ہیڈ کوارٹر (ٹی ایچ کیو) ہسپتال سوہاوہ کا بھی دورہ کیا، جہاں ہسپتال انتظامیہ کو بچوں کے علاج معالجے کے لیے مختلف اقسام کی ضروری ادویات کا قیمتی عطیہ پیش کیا گیا تاکہ کمسن مریضوں کو بہتر طبی سہولیات کی فراہمی میں معاونت حاصل ہو سکے۔
اس موقع پر جنرل سیکرٹری چوہدری فرحت کمال نے کہا کہ نور ویلفیئر سوسائٹی بلا تفریق انسانیت کی خدمت کے مشن پر کاربند ہے اور مستحق افراد کی مدد، صحت اور فلاح کے شعبوں میں اپنی خدمات کا دائرہ مزید وسیع کرنے کے لیے کوشاں ہے۔
اسسٹنٹ کمشنر سوہاوہ غزالہ اصغر نے نور ویلفیئر سوسائٹی کی سماجی خدمات کو سراہتے ہوئے کہا کہ دکھی انسانیت کی خدمت اور ضرورت مند افراد کی معاونت کے لیے ایسے فلاحی اقدامات وقت کی اہم ضرورت ہیں، اور معاشرے کے مخیر افراد و تنظیموں کا اس سلسلے میں کردار قابلِ تحسین ہے۔
