دینہ: ملک کاشف نے کہا کہ 28 مئی پاکستان کی تاریخ میں ایک سنہری دن ہے جب پاکستان نے ایٹمی دھماکے کر کے دنیا کو اپنی خودمختاری، غیرت اور طاقت کا پیغام دیا۔
پاکستان کے یومِ تکبیر کے موقع پر دینہ کے نواحی علاقہ چک اکا کی معروف سیاسی و سماجی شخصیت، سابق ممبر ضلع کونسل ملک صابر حسین (مرحوم) کے صاحبزادے ملک کاشف نے سابق وزیر اعظم میاں نواز شریف کو زبردست خراجِ تحسین پیش کرتے ہوئے کہا کہ میاں نواز شریف نے عالمی دباؤ اور لالچ بھری پیشکشوں کو مسترد کرتے ہوئے قومی مفاد کو مقدم جانا اور ایٹمی دھماکوں کا جرات مندانہ فیصلہ کیا۔ ان کے اس تاریخی اقدام سے پوری قوم کا سر فخر سے بلند ہو گیا اور آج پاکستان ایک ناقابلِ تسخیر ایٹمی قوت بن چکا ہے۔
انہوں نے کہا کہ ڈاکٹر عبدالقدیر خان اور دیگر سائنسدانوں کی خدمات بھی ناقابلِ فراموش ہیں، تاہم اس فیصلہ کن موقع پر سابق وزیر اعظم میاں نواز شریف کی جرات اور قیادت کو ہمیشہ یاد رکھا جائے گا۔
ملک کاشف نے مزید کہا کہ آج دشمن پاکستان کی طرف میلی آنکھ سے دیکھنے کی جرات نہیں کر سکتا، کیونکہ ہمارا دفاع مضبوط اور محفوظ ہاتھوں میں ہے۔ یومِ تکبیر کے موقع پر ہم اپنے قائد میاں نواز شریف، ڈاکٹر عبدالقدیر خان اور ان کی ٹیم کو خراجِ تحسین پیش کرتے ہیں، جنہوں نے پاکستان کو ناقابلِ تسخیر بنا کر پوری قوم کو عزت، وقار اور اعتماد عطا کیا۔
