پنڈدادنخان: تھانہ پنڈ دادنخان پولیس نے قتل کے مقدمات میں مطلوب اشتہاری مجرمان کے خلاف دو الگ الگ کارروائیاں کرتے ہوئے 3 اشتہاری مجرم گرفتار کر لیے۔
تفصیلات کے مطابق ڈی پی او جہلم طارق عزیز سندھو کی خصوصی ہدایت پر ایس ایچ او تھانہ پنڈ دادنخان اور پولیس ٹیم نے پہلی کارروائی میں قتل کے مقدمہ میں مطلوب 2 اشتہاری مجرمان کو گرفتار کر لیا۔ دونوں ملزمان طویل عرصہ سے پولیس کو مطلوب تھے اور گرفتاری سے بچنے کے لیے روپوش تھے۔ پولیس نے جدید سائنٹیفک طریقہ کار استعمال کرتے ہوئے ملزمان کو ٹریس کر کے گرفتار کیا۔
دوسری کارروائی میں پولیس نے سال 2023 کے قتل کیس میں مطلوب ایک اور اشتہاری مجرم کو گرفتار کیا، جس کے قبضے سے 30 بور پسٹل معہ ایمونیشن بھی برآمد کیا گیا۔ یہ ملزم بھی گرفتاری سے بچنے کے لیے روپوش تھا جسے جدید ٹیکنالوجی کی مدد سے گرفتار کیا گیا۔
ڈی پی او جہلم طارق عزیز سندھو نے اشتہاری مجرمان کی گرفتاری پر پولیس ٹیموں کی کارکردگی کو سراہتے ہوئے کہا کہ ضلع جہلم پولیس کا اشتہاری مجرموں کے خلاف بھرپور کریک ڈاؤن جاری ہے، اور کسی بھی سنگین مقدمے میں ملوث ملزمان کو قانون کے شکنجے سے نہیں بچنے دیا جائے گا۔
