دینہ: ڈپٹی کمشنر جہلم میر رضا اوزگن کی ہدایت پر اسسٹنٹ کمشنر دینہ تیمور خان نے یونین کونسل لدھڑ کے گاؤں میرا آباد کا دورہ کیا، جہاں انہوں نے "ستھرا پنجاب” اقدامات کے تحت جاری صفائی مہم کا تفصیلی معائنہ کیا۔
اس موقع پر راولپنڈی ویسٹ مینجمنٹ کمپنی کے تحصیل مینیجر بھی ان کے ہمراہ موجود تھے۔
دورے کے دوران اسسٹنٹ کمشنر نے گاؤں میں صفائی ستھرائی کی مجموعی صورتحال، کچرے کی بروقت منتقلی اور نالیوں کی صفائی کے عمل کا جائزہ لیا۔ انہوں نے متعلقہ عملے کو ہدایت کی کہ دیہی علاقوں میں صفائی کے معیار کو مزید بہتر بنانے کے لیے فیلڈ اسٹاف کی موجودگی اور ورکنگ پلان پر سختی سے عملدرآمد یقینی بنایا جائے۔
تیمور خان نے مقامی شہریوں سے ملاقات کر کے صفائی مہم کے حوالے سے فیڈ بیک بھی حاصل کیا اور جہاں بہتری کی گنجائش موجود تھی، وہاں فوری اصلاحی اقدامات کے احکامات جاری کیے۔
انہوں نے واضح کیا کہ حکومتِ پنجاب کے ویژن کے مطابق ہر شہری کو صاف ستھرا اور صحت مند ماحول فراہم کرنا ضلعی انتظامیہ کی اولین ترجیح ہے، اور اس ضمن میں کسی قسم کی غفلت یا کوتاہی ہرگز برداشت نہیں کی جائے گی۔
