دینہ:پیرا فورس نے منگلا روڈ، مین بازار اور نکودر چوک میں تجاوزات قائم کرنے والے دکانداروں اور ریڑھی بانوں کے خلاف سخت کارروائی کرتے ہوئے متعدد افراد کو گرفتار کر لیا۔
تفصیلات کے مطابق جہلم کی تحصیل دینہ میں اسسٹنٹ کمشنر تیمور خان کی ہدایت پر انچارج پیرا فورس دینہ ملک عدیل اور ان کی ٹیم نے مختلف علاقوں میں تجاوزات کے خلاف آپریشن کیا، جس کے دوران سرکاری حدود اور سڑکوں پر تجاوزات قائم کرنے والوں کے خلاف کارروائی عمل میں لائی گئی۔
کارروائی کے دوران متعدد دکانداروں اور ریڑھی بانوں کو گرفتار کیا گیا جبکہ کئی افراد کو بھاری جرمانے بھی عائد کیے گئے۔ بعض دکانداروں کو آئندہ کیلئے سخت وارننگ جاری کی گئی۔
اس موقع پر اسسٹنٹ کمشنر دینہ تیمور خان کا کہنا تھا کہ جن ریڑھی بانوں اور دکانداروں کو جرمانے کیے گئے، انہیں پہلے بھی کئی مرتبہ وارننگ دی جا چکی تھی، تاہم ہدایات پر عملدرآمد نہ ہونے پر کارروائی ناگزیر تھی۔
انہوں نے واضح کیا کہ تحصیل دینہ میں تجاوزات کے خلاف آپریشن بلاامتیاز جاری رہے گا اور کسی کو بھی سرکاری جگہوں پر غیر قانونی تجاوزات قائم کرنے کی اجازت نہیں دی جائے گی۔ اسسٹنٹ کمشنر نے مزید کہا کہ اس معاملے میں کسی قسم کی سفارش یا دباؤ قبول نہیں کیا جائے گا۔
