پنڈدادنخان: جہلم پولیس نے امن و امان کی صورتحال بہتر بنانے اور جرائم پیشہ عناصر کے خلاف کارروائیوں کا سلسلہ تیز کرتے ہوئے دو اہم کارروائیوں میں شراب اور ناجائز اسلحہ رکھنے والے ملزمان کو گرفتار کر لیا ہے۔
تفصیلات کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان اور ان کی ٹیم نے کامیاب کارروائی کرتے ہوئے شراب سپلائی کرنے والے ملزم مبشر علی کو گرفتار کر لیا۔ پولیس نے ملزم کے قبضے سے 20 لیٹر شراب برآمد کر لی۔ ملزم کے خلاف تھانہ پنڈدادنخان میں مقدمہ درج کر لیا گیا ہے اور مزید تفتیش جاری ہے۔
دوسری جانب ایس ایچ او تھانہ للِہ اور ان کی ٹیم نے کارروائی کرتے ہوئے ناجائز اسلحہ رکھنے والے ملزم محمد بلال کو گرفتار کر لیا۔ ملزم کے قبضے سے 30 بور پستول بمعہ ایمونیشن برآمد ہوا۔ ملزم کے خلاف تھانہ للِہ میں مقدمہ درج کر کے قانونی کارروائی شروع کر دی گئی ہے۔
ڈسٹرکٹ پولیس آفیسر جہلم طارق عزیز سندھو نے ان کارروائیوں کو سراہتے ہوئے کہا کہ ضلع بھر میں شراب سپلائرز اور ناجائز اسلحہ رکھنے والے عناصر کے خلاف بھرپور کریک ڈاؤن جاری ہے۔ انہوں نے واضح کیا کہ قانون کی عملداری کو ہر صورت یقینی بنایا جائے گا اور کسی کو بھی امن و امان خراب کرنے کی اجازت نہیں دی جائے گی۔
