جہلم: وزیراعلیٰ پنجاب مریم نواز شریف کے ویژن کے ثمرات سامنے آنا شروع ہو گئے ہیں، کرائم کنٹرول ڈیپارٹمنٹ (سی سی ڈی) نے جہلم سمیت پنجاب بھر میں جرائم پیشہ عناصر کے خلاف بڑے پیمانے پر مؤثر اور کامیاب کارروائیاں شروع کر دی ہیں۔
سی سی ڈی کے سربراہ سہیل ظفر چٹھہ کی قیادت میں جرائم کے خلاف ایسا سخت گیر اور مؤثر ایکشن دیکھنے میں آیا ہے کہ جرائم پیشہ عناصر محفوظ پناہ گاہوں کی تلاش میں دربدر ہو گئے ہیں، بعض نے بیرون ملک فرار ہونے کی کوششیں شروع کر دی ہیں، جب کہ کچھ زیر زمین چلے گئے ہیں۔
ذرائع کے مطابق سی سی ڈی نے صرف ڈیڑھ ماہ کے مختصر عرصے میں 130 سے زائد گینگسٹرز کو گرفتار کیا، جو قتل، اقدام قتل، ڈکیتی، اغواء، اغواء برائے تاوان، قبضہ، منشیات فروشی اور دیگر سنگین جرائم میں ملوث تھے۔ ان تمام کارروائیوں میں سی سی ڈی نے غیر معمولی پیشہ ورانہ مہارت کا مظاہرہ کرتے ہوئے ان آرگنائزڈ گروپوں کو ان کے ٹھکانوں سے ٹریس کر کے قانون کی گرفت میں لایا۔
یہی نہیں سی سی ڈی نے ڈیڑھ ماہ کے دوران ایک ہزار سے زائد انتہائی خطرناک اشتہاریوں کو بھی گرفتار کر لیا ہے، جن میں متعدد ایسے ملزمان بھی شامل ہیں جو عرصہ دراز سے قانون کی گرفت سے بچتے پھر رہے تھے۔
دلچسپ امر یہ ہے کہ اب صورت حال اس نہج پر پہنچ چکی ہے کہ متعدد نامی گرامی جرائم پیشہ افراد نے اپنی جان بچانے اور نیا راستہ اپنانے کے لیے مساجد کے علمائے کرام سے رابطے شروع کر دیے ہیں تاکہ جرم سے توبہ کر سکیں۔
شہریوں نے ان شاندار کامیابیوں پر وزیراعلیٰ پنجاب مریم نواز شریف، انسپکٹر جنرل پنجاب پولیس ڈاکٹر عثمان انور اور سی سی ڈی کے سربراہ سہیل ظفر چٹھہ کو زبردست خراجِ تحسین پیش کیا ہے اور مطالبہ کیا ہے کہ ایسے عناصر کو قانون کے کٹہرے میں لا کر قرار واقعی سزائیں دی جائیں تاکہ پنجاب کو جرائم سے پاک اور ملک کا پرامن ترین صوبہ بنایا جا سکے۔
عوام کا کہنا ہے کہ غریب، محنت کش، مزدور اور سفید پوش طبقے کے دلوں سے جرائم کا خوف ختم کرنا اب سی سی ڈی کی کامیابی کا واضح ثبوت ہے۔
