جہلم پولیس نے اپنی عوام دوست پالیسی کے تحت ایک مرتبہ پھر لاپتہ بچوں کو تلاش کر کے والدین سے ملا دیا، جس پر لواحقین نے پولیس کا تہہ دل سے شکریہ ادا کیا اور نیک تمناؤں کا اظہار کیا۔
تھانہ سٹی پولیس کو 15 سالہ قمر کے لاپتہ ہونے کی اطلاع موصول ہوئی، جس پر ایس ایچ او تھانہ سٹی اور ان کی ٹیم نے فوری کارروائی کرتے ہوئے قمر کو تلاش کر کے والدین کے حوالے کر دیا۔ پولیس کی بروقت کارروائی پر بچے کے والدین نے اظہار تشکر کرتے ہوئے پولیس کی کاوش کو سراہا۔
اسی طرح تھانہ سوہاوہ کے علاقے میں بھی 2 سالہ محمد وارث کے لاپتہ ہونے پر پولیس کو اطلاع دی گئی۔ ایس ایچ او تھانہ سوہاوہ اور ان کی ٹیم نے کئی گھنٹوں کی تلاش کے بعد نالہ کانسی کے قریب سے بچے کو بحفاظت تلاش کر کے اس کے والدین کے حوالے کر دیا۔ والدین نے بچے کی خیریت سے بازیابی پر پولیس کا شکریہ ادا کیا۔
ڈی پی او جہلم طارق عزیز سندھو نے پولیس کی اس کامیاب کارروائی کو سراہتے ہوئے ایس ایچ او تھانہ سٹی، ایس ایچ او تھانہ سوہاوہ اور ان کی ٹیم کو شاباش دی، تعریفی اسناد اور نقد انعام دینے کا اعلان کیا۔ ان کا کہنا تھا کہ جہلم پولیس نہ صرف شہریوں کی جان و مال کے تحفظ کے لیے ہمہ وقت تیار ہے بلکہ کسی بھی ہنگامی صورتحال میں فوری مدد فراہم کرنا ان کی اولین ترجیح ہے۔
ڈی پی او جہلم نے والدین سے اپیل کی کہ وہ اپنے بچوں پر خصوصی توجہ دیں اور انہیں تنہا باہر نہ جانے دیں تاکہ کسی بھی ناخوشگوار واقعے سے بچا جا سکے۔
