جہلم شہر سمیت ضلع بھر میں رمضان کی آمد کیساتھ ہی پھلوں کی قیمتیں آسمان پر پہنچ گئیں، رمضان کی آمد سے قبل ہی شہر میں منافع خور لنگوٹ کس کر میدان میں آگئے۔
تفصیلات کے مطابق جہلم شہر سمیت ضلع بھر میں رمضان المبارک کی آمد سے قبل پھلوں کی قیمتوں میں اضافہ کردیا ہے، منافع خور وں نے بھی لنگوٹ کس کے شہریوں کی چمڑیاں ادھیڑنے کے لئے بازاروں میں ڈیرے لگا لئے ہیں ۔
شہر سمیت ضلع بھر میں کسی بھی جگہ چلے جائیں خریدار پھلوں کی مہنگائی کا رونا روتے دکھائی دیتے ہیں ، بازاروں میں چند روز قبل 100 سے 120 روپے درجن فروخت ہونے والا کیلا اچانک 250 روپے فی درجن میں فروخت ہو رہا ہے جبکہ سیب 400 روپے کلو، ایرانی کھجور 700 روپے کلو، مسمی 400 سے 500 روپے درجن میں فروخت ہو رہا ہے۔
دکانداروں نے سرکاری نرخ ناموں کو خاطر میں نہ لاتے ہوئے یکسر مسترد کررکھا ہے ، گراں فروشوں کو متعلقہ انتظامیہ کنٹرول کرنے میں ناکام دکھائی دیتی ہے۔
شہریوں نے دہائی دیتے ہوئے وزیر اعلیٰ پنجاب، چیف سیکرٹری پنجاب اور ایڈوائزر صوبائی محتسب پنجاب سے مطالبہ کیاہے کہ گراں فروشوں کے خلاف روزانہ کی بنیاد پر فوجداری مقدمات درج کروائے جائیں تاکہ مہنگائی اور گراں فروشی کا خاتمہ ممکن ہو سکے۔
