سوہاوہ: دی فاسٹ اسکول اینڈ کالج بڑاگواہ میں جاری پانچ روزہ اسپورٹس گالا خوشگوار اور جوش و خروش سے بھرپور ماحول میں اختتام پذیر ہو گیا۔
اسپورٹس گالا کی اختتامی تقریب کا آغاز تلاوتِ قرآنِ پاک اور نعتِ رسولِ مقبول ﷺ سے کیا گیا۔ اسپورٹس گالا کے دوران اسکول اور کالج کے طلبہ و طالبات نے مختلف کھیلوں اور تفریحی مقابلہ جات میں بھرپور شرکت کر کے اپنی جسمانی صلاحیتوں، مہارت اور چھپے ہوئے ٹیلنٹ کا شاندار مظاہرہ کیا۔
اس موقع پر منعقدہ اختتامی تقریب میں طلبہ و طالبات کے ساتھ ساتھ والدین کی بڑی تعداد نے شرکت کی، جس سے تقریب کی رونق میں مزید اضافہ ہوا۔
اسپورٹس گالا میں کرکٹ، بیڈمنٹن، دوڑ، رسہ کشی، جمپنگ، ڈرائنگ مقابلہ، کھانے پکانے کے مقابلے، کرسیوں پر بیٹھنے، غباروں پر بیٹھ کر پھاڑنے، ہاتھ چھوڑ کر فروٹ اور بسکٹ کھانے، کپ کے ساتھ بلڈنگ بنانے سمیت متعدد دلچسپ اور تفریحی مقابلے شامل تھے۔
دلچسپ امر یہ تھا کہ ٹیچرز اور والدین کے درمیان بھی رسہ کشی کا مقابلہ کروایا گیا، جس میں اساتذہ نے کامیابی حاصل کی اور شرکاء سے خوب داد وصول کی۔
اختتامی تقریب کے دوران تمام مقابلہ جات میں نمایاں کارکردگی دکھانے والے کامیاب طلبہ و طالبات میں انعامات تقسیم کیے گئے، جس پر بچوں کے چہروں پر خوشی دیدنی تھی۔
اس موقع پر پرنسپل نے خطاب کرتے ہوئے کہا کہ اس طرح کی ہم نصابی اور اسپورٹس سرگرمیاں بچوں کی جسمانی اور ذہنی صحت کے لیے نہایت مفید ثابت ہوتی ہیں اور ان کے اندر موجود صلاحیتوں کو اجاگر کرنے کا بہترین ذریعہ ہیں۔ انہوں نے کامیاب طلبہ و طالبات کو مبارکباد دی اور کہا کہ ہار جیت کھیل کا حصہ ہوتی ہے، جن بچوں کو اس بار کامیابی نہ مل سکی وہ آئندہ سال مزید محنت اور تیاری کریں۔
پرنسپل نے تقریب میں شرکت کرنے والے تمام والدین کا بھی شکریہ ادا کیا جنہوں نے اپنا قیمتی وقت نکال کر بچوں کی حوصلہ افزائی کی اور تقریب کو چار چاند لگائے۔ اسپورٹس گالا خوشگوار ماحول اور یادگار لمحات کے ساتھ اختتام پذیر ہوا۔
