سوہاوہ: عدالت نے سوہاوہ میں درج منشیات کے مقدمات کا فیصلہ سناتے ہوئے مجرموں محمد شاکر اور سہیل احمد کو بھاری سزا سنائی۔
تفصیلات کے مطابق جہلم کی تحصیل سوہاوہ میں منشیات کے مقدمہ نمبر 345/23 بجرم CNSA 9(i)5F تھانہ سوہاوہ میں جرم ثابت ہونے پر محمد شاکر کو 20 سال قید اور 08 لاکھ روپے جرمانہ کی سزا دی گئی جبکہ بجرم CNSA 9(i)3E میں بھی جرم ثابت ہونے پر اسے 20 سال قید اور 8 لاکھ روپے جرمانہ سنایا گیا۔
اسی طرح مجرم سہیل احمد نے بھی منشیات فروشی کے جرم کا ارتکاب کیا تھا، جس پر عدالت نے جرم ثابت ہونے پر اسے بجرم CNSA 9(i)5F اور CNSA 9(i)3E میں ہر جرم کے لیے 20 سال قید اور 8 لاکھ روپے جرمانہ کی سزا سنائی۔
مجرموں کو منشیات فروشی کے جرم میں گرفتار کیا گیا تھا اور جہلم پولیس نے انہیں ٹریس کر کے گرفتار کیا اور ٹھوس شواہد کے ساتھ عدالت میں چالان کیا۔ مقدمات کی مؤثر پیروی کے باعث عدالت نے مجرموں کو قرار واقعی سزا سنائی۔
ڈی پی او جہلم طارق عزیز سندھو نے اس موقع پر کہا کہ منشیات فروش معاشرے کا ناسور ہیں اور ان کے خاتمے کے لیے بھرپور آپریشن جاری رہے گا۔ انہوں نے اپنی انوسٹیگیشن اور لیگل ٹیموں کی کارکردگی کو سراہا اور انہیں شاباش، تعریفی سرٹیفکیٹ اور نقد انعام دینے کا اعلان کیا، تاکہ قانون نافذ کرنے والے اداروں میں جذبہ اور محنت کو فروغ ملے۔
