پنڈدادنخان میں کچے مکان کی چھت گرنے سے 45 سالہ شخص جاں بحق ہو گیا، لاش کو ٹی ایچ کیو ہسپتال منتقل کر دیا گیا۔
تفصیلات کے مطابق جہلم کی تحصیل پنڈدادنخان میں ایک افسوسناک واقعہ پیش آیا جہاں کچے مکان کی چھت گرنے کے نتیجے میں ملبے تلے دب کر 45 سالہ شخص جاں بحق ہو گیا۔ واقعے کے بعد علاقے میں سوگ کی فضا چھا گئی۔
اہل خانہ کے مطابق گزشتہ روز ہونے والی بارش کے باعث مکان کی چھت نم اور کمزور ہو چکی تھی۔ متوفی اپنے گھر میں موجود تھا کہ اچانک کچے مکان کی چھت زمین بوس ہو گئی اور وہ ملبے تلے دب گیا۔
اطلاع ملتے ہی ریسکیو 1122 کی ٹیم فوری طور پر جائے وقوعہ پر پہنچ گئی اور امدادی کارروائیاں شروع کر دیں۔ ریسکیو اہلکاروں نے ملبہ ہٹا کر متاثرہ شخص کو باہر نکالا، تاہم وہ جانبر نہ ہو سکا۔
ریسکیو ذرائع کے مطابق ضروری کارروائی کے بعد متوفی کی لاش تحصیل ہیڈکوارٹر ہسپتال پنڈدادنخان منتقل کر دی گئی، جہاں قانونی تقاضے مکمل کیے گئے۔
