پنڈدادنخان: پولیس نے جرائم پیشہ عناصر کے خلاف کارروائی کرتے ہوئے دو الگ الگ کارروائیوں میں چوری کے مقدمے میں ملوث ایک ملزم اور لڑائی جھگڑا کر کے جان سے مارنے کی دھمکیاں دینے والے ایک اور ملزم کو گرفتار کر لیا۔
ترجمان جہلم پولیس کے مطابق جہلم کی تحصیل پنڈدادنخان میں ایس ایچ او تھانہ پنڈ دادنخان اور ان کی ٹیم نے چوری کے مقدمے میں کارروائی کرتے ہوئے ایک ملزم کو گرفتار کیا، جس کے قبضے سے ایک تولہ سونا مالیتی 4 لاکھ 15 ہزار روپے، 40 ہزار روپے نقدی، ایک موبائل فون اور ایک عدد گھڑی برآمد کر کے قبضہ پولیس میں لے لی گئی۔
پولیس حکام کے مطابق گرفتار ملزم سے مزید تفتیش جاری ہے اور اسے ٹھوس شواہد کے ساتھ عدالت میں چالان کیا جائے گا تاکہ قانون کے مطابق قرار واقعی سزا دلوائی جا سکے۔
ایک دوسری کارروائی میں ایس ایچ او تھانہ پنڈ دادنخان اور پولیس ٹیم نے لڑائی جھگڑا کرنے اور شہری کو جان سے مارنے کی دھمکیاں دینے والے ملزم کو گرفتار کر لیا۔ پولیس نے ملزم کے خلاف تھانہ پنڈ دادنخان میں مقدمہ درج کر کے مزید قانونی کارروائی کا آغاز کر دیا ہے۔
ڈسٹرکٹ پولیس آفیسر جہلم شفیق احمد چوہدری نے کہا کہ شہریوں کو ان کے قیمتی اثاثوں سے محروم کرنے والے اور قانون شکنی میں ملوث عناصر کسی رعایت کے مستحق نہیں۔ انہوں نے واضح کیا کہ شہریوں کے جان و مال کا تحفظ جہلم پولیس کی اولین ترجیح ہے اور جرائم پیشہ عناصر کے خلاف بلاامتیاز کریک ڈاؤن آئندہ بھی جاری رہے گا۔
