دینہ پولیس نے بڑی کارروائی کرتے ہوئے غیر قانونی پتنگیں اور خونی ڈوریں رکھنے والے ملزم کو گرفتار کر لیا۔
تفصیلات کے مطابق جہلم کی تحصیل دینہ میں ایس ایچ او تھانہ دینہ اور ان کی ٹیم نے غیر قانونی طور پر پتنگیں اور خونی ڈوریں قبضے میں رکھنے کے خلاف اہم کارروائی کرتے ہوئے ایک ملزم کو گرفتار کر لیا۔
حکومتِ پنجاب کی جانب سے پتنگ بازی اور پتنگ فروشی پر مکمل پابندی عائد ہے، تاہم گرفتار ملزم نے پتنگیں اپنے پاس رکھ کر قانون کی خلاف ورزی کی۔ پولیس نے کارروائی کے دوران ملزم کے قبضے سے 162 عدد پتنگیں اور 22 خونی ڈوریں برآمد کر لیں۔ برآمدگی کے بعد ملزم کے خلاف تھانہ دینہ میں مقدمہ درج کر کے مزید قانونی کارروائی شروع کر دی گئی ہے۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ پتنگ فروشی، پتنگ بازی اور شہریوں کی جان و مال کو نقصان پہنچانے والے عناصر کے خلاف زیرو ٹالرنس پالیسی کے تحت آہنی ہاتھوں سے نمٹا جائے گا۔ انہوں نے واضح کیا کہ ضلع بھر میں اس پابندی پر سختی سے عملدرآمد یقینی بنایا جا رہا ہے اور خلاف ورزی کرنے والوں کے خلاف بلاامتیاز کارروائیاں جاری رہیں گی۔
