جہلم: محرم الحرام کی مجالس کے سلسلے میں ضلعی انتظامیہ کی جانب سے تمام ضروری اقدامات مکمل کر لیے گئے ہیں اور عزاداروں کو ہر ممکن سہولیات فراہم کی جا رہی ہیں۔
ڈپٹی کمشنر جہلم میثم عباس نے اس بات کا اظہار امام بارگاہ جعفریہ مشین محلہ کے دورے کے دوران کیا، جہاں انہوں نے مجالس عزا کے حوالے سے انتظامات کا تفصیلی جائزہ لیا۔ دورے کے دوران ڈپٹی کمشنر کے ہمراہ متعلقہ افسران بھی موجود تھے۔
انہوں نے امام بارگاہ کی سیکیورٹی، صفائی، روشنی، پانی کی فراہمی اور دیگر سہولیات کا جائزہ لیتے ہوئے موقع پر موجود اہلکاروں کو ہدایات جاری کیں کہ عزاداروں کو کسی قسم کی پریشانی کا سامنا نہ کرنا پڑے۔
اس موقع پر مقامی لائسنس داران باقر شاہ اور جری شاہ نے ڈی سی جہلم سے گفتگو کرتے ہوئے ضلعی انتظامیہ کی جانب سے کیے گئے انتظامات پر اطمینان اور اطمینان کا اظہار کیا اور کہا کہ موجودہ اقدامات مثالی اور قابل تعریف ہیں۔
ڈپٹی کمشنر میثم عباس نے امام بارگاہ کی انتظامیہ کو یقین دہانی کروائی کہ ضلعی انتظامیہ ہر قسم کے تعاون کے لیے 24 گھنٹے دستیاب ہے اور کسی بھی ہنگامی صورتحال سے نمٹنے کے لیے مکمل تیار ہے۔ انہوں نے موقع پر موجود افسران کو سختی سے ہدایت کی کہ مجالس اور جلوسوں کے دوران فول پروف سیکیورٹی کو یقینی بنایا جائے اور انتظامات میں کسی قسم کی کوتاہی نہ برتی جائے۔
انہوں نے کہا کہ ضلعی انتظامیہ، سیکیورٹی ادارے اور لائسنس داران باہمی مشاورت اور تعاون سے محرم الحرام کے دوران امن و امان، بین المسالک ہم آہنگی اور عوامی سہولت کے لیے مشترکہ طور پر کام کر رہے ہیں، تاکہ عزادار اپنی مذہبی رسومات مکمل اطمینان اور تحفظ کے ساتھ ادا کر سکیں۔
