جہلم: مشیرِ صحت پنجاب میجر جنرل (ر) ڈاکٹر اظہر کیانی نے کہا ہے کہ آزاد ملک اللہ تعالیٰ کی لازوال نعمت ہے، جس کا ہر لمحہ شکر ادا کرنا چاہیے۔ وطن کے محافظوں نے گزشتہ 78 برسوں میں جس جانفشانی سے ملک کی سرحدوں کی حفاظت کی ہے، اس پر پوری قوم اپنی بہادر افواج کے ہر سپاہی کی شکر گزار ہے۔
وہ ڈسٹرکٹ ہیڈ کوارٹر ہسپتال جہلم میں یومِ آزادی کی تقریب میں کیک کاٹنے کے بعد گفتگو کر رہے تھے۔ اس موقع پر ڈپٹی کمشنر جہلم میثم عباس، صدر انجمن بہبودی مریضاں چوہدری ساجد میر، ایم ایس سول ہسپتال ڈاکٹر سہیل اعجاز اور دیگر افسران بھی موجود تھے۔
مشیرِ صحت پنجاب نے تقریب کے بعد ہسپتال کے مختلف شعبہ جات کا دورہ کیا، مریضوں اور ان کے اہل خانہ سے ملاقات کی، جشنِ آزادی کی خوشی میں مٹھائی تقسیم کی اور مریضوں کی عیادت کی۔ انہوں نے ہسپتال انتظامیہ کو ہدایت کی کہ مریضوں کو ہر ممکن بہترین طبی سہولیات فراہم کی جائیں۔
