کینیڈا کی وفاقی وزیر صحت کمل کھیرا نے کہا ہے کہ پاکستانیوں نے کینیڈا کی تعمیر و ترقی میں جو بھرپور کردار ادا کیا ہے وہ قابل تعریف ہے،ہماری خواہش اور کوشش ہے کہ کینیڈا میں مقیم تمام پاکستانی کینیڈا کی سیاست میں بھی بھرپور انداز میں حصہ لیں خصوصاً ان کی لبرل پارٹی کو کامیاب کرائیں تاکہ مل جل کر ہم کینیڈا کو ایک عظیم تر ملک بنا سکیں۔
انہوں نے ان خیالات کا اظہار کینیڈا میں مقیم ممتاز پاکستانی بزنس مین اور ڈائریکٹر سیالکوٹ انٹرنیشنل ائرپورٹ لمیٹڈ محمد جاوید چودھری اور ان کے صاحبزادوں شہروز علی چودھری اورحسن علی چودھری کی طرف سے اپنی رہائش گاہ میں ان کے اعزاز میں دئیے جانے والے استقبالیہ میں خطاب کرتے ہوئے کیا۔
اس موقع پر مرتضیٰ جوئیہ، چودھری طاہر، چودھری طارق لطیف، حمیر خان، حافظ محمد صہیب حفیظ مرزا، حسیب رانا، طاہر خان، محمد آصف، زاہد غلام نبی، وقار حسین، ریاض علی، ادریس خان، طارق حسین، شہروز علی چودھری، حسن علی چودھری، میاں وقاص، میاں توحید اور میاں شاہ زیب کے علاوہ دیگر پاکستانی بڑی تعداد میں موجود تھے۔ کینیڈا کی وفاقی وزیر صحت کمل کھیرا نے محمد جاوید چودھری اور ان کے صاحبزادوں شہروز علی چودھری اورحسن علی چودھری کی طرف سے دی جانے والی دعوت پر ان کا شکریہ ادا کیا اور کہا کہ جس طرح انہوں نے پہلے تین بار انہیں ممبر پارلیمنٹ بننے میں مدد کی اسی طرح اس بار بھی بھرپور کامیابی دلائیں گے۔
میزبان محمد جاوید چودھری نے اپنے خطاب میں وفاقی وزیر صحت کمل کھیرا کا ان کے گھر تشریف لانے پر شکریہ ادا کیا اور انہیں اپنے بھرپور تعاون کا یقین دلایا۔ محمد جاوید چودھری نے کہا کہ انہیں اس بات پر خوشی ہے کہ کینیڈ ا کے 28 اپریل کو وفاقی انتخابات میں 45 ویں کینیڈین پارلیمنٹ کے لیے ہاؤس آف کامنز لئے ہونے والے انتخابات میں تقریباً تمام پارٹیوں میں پاکستانی امیدوار بھی سامنے آئے ہیں۔ان کی لبرل پارٹی کی طرف سے شفقت علی، سلمیٰ زاہد اور اقرا خالد کی اس بار بھی کامیابی یقینی ہے۔ ان تمام پاکستانی امیدواروں نے اپنی نمایاں کارکردگی کی بناء پر اپنی مقبولیت میں اضافہ کرکے ہمارے سر فخر سے بلند کر دیئے ہیں۔
محمد جاوید چودھری نے مزید کہا کہ ان انتخابات میں لبرل پارٹی بڑی واضح اکثریت حاصل کرے گی اور اپنی حکومت بنائے گی جبکہ مار کونی وزیر اعظم منتخب ہوجائیں گے۔پاکستانیوں کی اکثریت لبرل پارٹی کے امیدواروں کی حمایت کر رہے ہیں اور اس کی انتخابی مہم میں بڑھ چڑھ کر حصہ لے رہے ہیں۔ لبرل پارٹی کا اصل مقابلہ پی سی پارٹی کے مابین ہوگا۔ ایک سروے کے مطابق اس وقت 180 نشستوں پر لبرل پارٹی جبکہ پی سی پارٹی 130 نشستوں کے دوسرے نمبر آمنے سامنے ہے جبکہ انتخابات میں واضح اکثریت حاصل کر نے کے لئے 343 میں سے 172 نشستیں حاصل کرنا ضروری ہے۔
تقریب سے حسن علی چودھری نے خطاب کرتے ہوئے اس عزم کا اظہار کیا کہ پاکستانی نوجوان انتخابات میں بڑھ چڑھ کر حصہ لیں گے اور اپنی پسند کے امیدواروں کو کامیاب کرائیں گے۔واضح رہے کہ اس بار 2021کینیڈین مردم شماری کی بنیاد پر 343 سیٹوں کے نئے انتخابی نقشے کا استعمال کرنے والا یہ پہلا الیکشن ہوگا۔
