اسرائیل نے فلسطین کی مذاحمتی تحریک حماس کے حملوں کے بعد غزہ کا محاصرہ کر رکھا ہے، جہاں پر اسرائیلی بمباری سے عمارتیں تباہ اور ہزاروں کی تعداد میں فلسطینی مرد، بچے اور خواتین شہید ہو چکے ہیں۔
فلسطین پر اسرائیلی جارحیت کے خلاف پاکستان سمیت دُنیا بھر میں احتجاجی مظاہرے اور ریلیاں نکالی گئیں، جن میں اسرائیلی فضائی بمباری کی شدید مذمت کی گئی اور اقوام متحدہ، اسلامی تعاون تنظیم اور دیگر انسانی حقوق کی تنظیموں سے مطالبہ کیا گیا کہ فلسطین پر اسرائیلی بمباری کا سلسلہ فوری بند کیا جائے۔
پاکستان کے دیگر شہروں کی طرح فلسطین کے مسلمانوں پر اسرائیل کی جانب سے ظلم و بربریت کے خلاف ضلع جہلم میں بھی احتجاجی ریلی نکالی گئیں۔
جہلم میں جماعت اسلامی کی جانب سے ڈاکٹر قاسم محمود چوہدری کی قیادت میں جماعت اسلامی کے مرکزی دفتر سے ریلی نکالی گئی جبکہ مرکزی جمعیت اہل حدیث پاکستان کی جانب سے بھی احتجاجی ریلی نکالی گئی، ریلی چوک اہل حدیث سے نکالی گئی جو شاندار چوک سے ہوتی ہوئی چوک اہل حدیث پر پہنچ کر اختتام پذیر ہوئی۔
تحریک خدام اہل سنت و الجماعت جہلم کے زیر اہتمام فلسطین کے مظلوم عوام کی حمایت اور اسرائیلی جارحیت کے خلاف ل مولانا قاری محمد ابوبکر صدیق جہلمی کی قیادت میں بڑا احتجاجی مظاہرہ کیا گیا۔ مظاہرے میں تمام مسالک، تاجران، وکلاء، سیاسی قائدین اور صحافی برادری کی بڑی تعداد نے شرکت کی۔
دوسری جانب جہلم شہر میں مرکزی مسلم لیگ کی جانب سے ریلی نکالی گئی، ریلی کی قیادت پاکستان مرکزی مسلم لیگ کے ضلعی صدر پروفیسر ہارون رفیق نے کی احتجاجی ریلی میں ان کے ساتھ سیاسی سماجی شخصیت محمود مرزا جہلمی، شیخ ندیم، حفظ ظفر اقبال، ملک اشرف محمود صدر انجمن شہریان، سرپرست اعلیٰ محمد غیاث الدین، مرزا اکمل بیگ، ملک افضل اعوان، مولانا معروف احمد، مرزا اشفاق بیگ، ظفر اقبال مغل اور خالد بٹ کے علاوہ سینکڑوں افراد نے کثیر تعداد میں شرکت کی۔
جہلم شہر کے علاوہ دینہ، سوہاوہ اور پنڈدادنخان میں بھی احتجاجی ریلیاں نکالی گئیں۔ ریلی کے شرکا نے اپنے ہاتھوں میں پلے کارڈ اور بینرز اٹھا رکھے تھے جن میں اسرائیل کیخلاف نعرے درج تھے،ریلی کے شرکا نے اسرائیل کے خلاف خوب نعرے بازی کی۔
اس موقع پر جماعت اسلامی کے ڈاکٹر قاسم محمود چوہدری نے خطاب کرتے ہوئے کہا کہ جماعت اسلامی آج سراج الحق کی کال پر احتجاجی مظاہرہ کر رہی ہے اس کا مقصد یہ ہے کہ ہم اپنے حکمرانوں کو بیدار کریں کے وہ کھل کر فلسطین کی حمایت کریں۔
انہوں نے کہا کہ ہم تمام مسلمان ممالک کو پیغام دیتے ہیں کہ وہ فلسطین کا ساتھ دیں اسرائیل کی بربریت کے خلاف آواز آٹھائیں اسرائیل ایک ناجائز ریاست ہے ہم اس کو تسلیم نہیں کرتے اور اس کی پر زور مذمت کرتے ہیں۔
محمود مرزا جہلمی نے ریلی کے شرکا سے خطاب کرتے ہوئے کہا کہ ہماری قوم اپنے اصل مقصد کو بھول گی ہے ہم فرقوں میں تقسیم ہو گئے ہیں ہمارا جو رعب تھا دشمن پر وہ ختم ہو گیا ہے۔ آج دنیا کی سب سے کمزور قوم ہم ہیں آج فلسطین دیکھیں لہو لہو ہے ہمارا کوئی پرسان حال نہیں۔
انہوں نے مزید کہا کہ ہمیں سوچنا ہوگا تو آئیے آج ہم ایک قوم بنیں ایک ملت بنیں اور اپنے ملکوں کے اندر ایسے حکمران لائیں جو مسلمانوں کی ترجمانی کریں۔
یاد رہے کہ گزشتہ ہفتے کے روز حماس جنگجوؤں کی جانب سے اچانک حملوں کے بعد اسرائیلی فوج غزہ پر شدید ترین بمباری کر رہی ہے۔ اسرائیل نے غزہ کا محاصرہ کر رکھا ہے جس میں 23 لاکھ افراد آباد ہیں جبکہ مقامی حکام کا کہنا ہے کہ 1500 سے زیادہ فلسطینی شہید ہو چکے ہیں۔
