جہلم: ڈسٹرکٹ پولیس آفیسر (ڈی پی او) جہلم طارق عزیز سندھو کی ہدایات پر ضلع بھر میں دہشت گردوں، جرائم پیشہ عناصر کی سرکوبی اور اہم تنصیبات کی سیکیورٹی کو فول پروف بنانے کے لیے سپیشل سرچ آپریشنز اور ناکہ بندی کی گئی۔
پولیس کی جانب سے ضلع بھر میں 12 مختلف مقامات پر سرچ آپریشنز کیے گئے، جس دوران 390 افراد کی چیکنگ کی گئی اور شہریوں کی تصدیق پولیس ایپلی کیشن کے ذریعے کی گئی۔ اس کے علاوہ شہر کے داخلی و خارجی راستوں پر سخت ناکہ بندی کرتے ہوئے گاڑیوں اور مشتبہ افراد کی چیکنگ کی گئی۔
ڈی پی او جہلم طارق عزیز سندھو کا کہنا تھا کہ سرچ آپریشنز کا مقصد غیر قانونی اسلحہ اور منشیات کی برآمدگی، سماج دشمن عناصر کی سرکوبی اور مجرمان اشتہاریوں کی گرفتاری ہے تاکہ کسی بھی شرپسند کو اپنے مذموم عزائم کی تکمیل کا موقع نہ ملے۔
