جہلم: جہلم پولیس اور سیف سٹی جہلم نے مشترکہ کارروائی کرتے ہوئے بہاولپور میں اوور اسپیڈنگ اور غفلت سے ٹرالا چلا کر شہری کو ٹکر مار کر جاں بحق کرنے والے ڈرائیور کو گرفتار کر لیا۔
تفصیلات کے مطابق جہلم پولیس اور سیف سٹی جہلم نے بروقت اور مؤثر کارروائی کرتے ہوئے بہاولپور میں اوور اسپیڈنگ اور لاپرواہی سے ٹرالا چلا کر ایک شہری کو جاں بحق کرنے والے ملزم کو تھانہ سٹی پولیس نے پانچ منٹ کے اندر ریسپانس کرتے ہوئے گرفتار کر لیا،سیف سٹی کے جدید کیمروں اور مربوط مانیٹرنگ سسٹم کی مدد سے ٹرالا کی لوکیشن بروقت ٹریس کی گئی اور فوری ریسپانس دیتے ہوئے ٹرالا اور اس کے ڈرائیور کو گرفتار کیا گیا،
پولیس کے مطابق مشکوک ٹرالا جیسے ہی جہلم کے علاقے میں داخل ہوا تو سیف سٹی جہلم نے فوری طور پر تھانہ سٹی پولیس کو اطلاع دی جس پر پولیس ٹیم موقع پر پہنچی اور ملزم کو گرفتار کر لیا گیا۔
ڈی پی او جہلم شفیق احمد چوہدری کا کہنا ہے کہ عوام کے جان و مال کا تحفظ پولیس کی اولین ترجیح ہے اور جدید ٹیکنالوجی کے استعمال سے جرائم کے فوری سدباب کے اقدامات مزید مؤثر بنائے جا رہے ہیں۔ انہوں نے کہا کہ قانون کی خلاف ورزی کرنے والوں کے خلاف بلا امتیاز کارروائی جاری رہے گی۔
